ТОШКЕНТ, 20 июл — Sputnik. Сал олдин “Ўзбекнаво” эстрада бирлашмаси сайтида хонандалар Сарвар ва Комил, шунингдек, актриса ва хонанда Ситора Фармонованинг лицензиялари тугатилиши ҳақида расмий билдириш эълон қилган эди.
"Биринчидан, ҳеч бир хонанданинг лицензияси бекордан бекорга тугатилмайди. Мазкур хонандалар хорижга чиқиб, огоҳлантирмасдан дам олиши майли, белгиланган тартиб-қоидаларни бузиб, концерт бериш даражасига ҳам етмоқда. Ўзбек санъаткорларининг чет элда концерт бериши яхши, аммо унинг ҳам ўзига яраша тартиб-қоидалари бор. Санъаткорларимиз қаерда концерт бераётганини биз билишимиз керак”, — деган "Ўзбекнаво" вакили.
“Иккинчидан, санъаткорларимиз чет элга бориб, у ерда 200—250 кишилик залларни ҳам тўлдира олмаслиги уятли ҳолат — эртага кимдир ушбу ҳолатни ҳам ёзиб чиқиши мумкин. Асосий мақсадимиз — ўзбек эстрада санъатини кўтариш, дунёга танитиш. Лекин санъаткорларимиз чет элга берухсат бориб, 200 кишилик зални ҳам тўлдира олмай, текинга концерт бериб, шарманда бўлиб қайтиб келишларини хоҳламаймиз”, — деди Одилжон Абдуқаҳҳоров.
