ТОШКЕНТ, 21 июн — Sputnik. Кеча Женевада "Мирзо Улуғбек. Осмон тоқига қўйилган нарвон" тарихий ҳужжатли фильмининг премьераси бўлиб ўтди. Бу ҳақда Ўзбекистоннинг Биринчи президентининг кенжа қизи Лола Каримова-Тиллаева ўзининг Instagram саҳифасида маълум қилди.
Фильм намойиши "The Club des leaders" халқаро жамиятнинг Швейцариядаги ваколатхонаси томонидан ташкил этилди.
"Ушбу кинолентани бугун эътиборингизга ҳавола этиш мен учун катта шараф. XV асрда, Мирзо Улуғбек ҳукмронлик қилган даврда Самарқанд астрономия, математика ва геометрия соҳаларида илғор илмий тадқиқотлар халқаро марказига айланди. Бу буюк инсон, етук олим ва адолатли ҳукмдор шахси болалигимдан мени ўзига мафтун этган эди. Унинг ҳикояси замондошларимиз эътиборига ҳавола этилиши лозим," — дея таъкидлади Лола Каримова-Тилляева фильмнинг тақдимотида.
Режиссёр Баҳодир Юлдошев ушбу кинокартинада XV асрнинг буюк астрономи ҳамда Мовароуннаҳр ҳукмдори Мирзо Улуғбек ҳаётидаги фожиалар, мушкулотлар ва зафарларни акс эттиришга ҳаракат қилган.
Соҳибқирон Амир Темурнинг невараси бўлмиш Мирзо Улуғбек дунё илм-фанида ўчмас из қолдирган. Самарқанд унинг ҳукмронлиги даврида астрономия соҳасида тадқиқотлар ўтказиладиган халқаро марказга айланди. Улуғбек бунёд эттирган муаззам расадхонада ўз даврининг пешқадам олиму фузалолари жам бўлган эди.
Аллома тартиб берган астрономия жадвалида 1118 та юлдузнинг ҳолати ва жойлашуви муфассал баён этилган. У ҳисоблаб чиққан йил узунлиги натижалари эса замонавий ҳисоб-китоблардан атиги 25 сонияга фарқланади. Буюк олим, шунингдек, Ер сайёраси ўқининг оғиш бурчаги 23,52 градусни ташкил этишини аниқлади, ушбу илмий натижа ҳам ҳозирга қадар энг аниқ кўрсаткич дея эътироф этилади.
Бизнинг Telegramдаги ўзбекча каналимизга обуна бўлинг ва энг янги хабарларни биринчи бўлиб ўқинг.
