ТОШКЕНТ, 30 дек — Sputnik. Ташқи ишлар вазирлиги Консуллик бошқармасининг маълумотларига кўра, Санкт-Петербург шаҳрида содир этилган портлаш оқибатида жабрланган Ўзбекистон фуқароси Ҳазраткул Аликуловнинг (исми аниқлаштирилди) ҳолати муваффақиятли операциядан сўнг барқарор. Бу ҳақда Ўзбекистон ТИВ матбуот хизмати хабар бермоқда.
Хабарда айтилишича, Александровский номли 17-сон шаҳар касалхонасида ўтказилган операция натижасида унинг танасига жароҳат етказган жисм олиб ташланди.
"ТИВ Консуллик бошқармаси ва Ўзбекистоннинг Россиядаги консуллиги ходимлари Санкт-Петербург шаҳри расмийлари билан доимий алоқада бўлиб, теракт оқибатида жабрланганга тегишли қопловлар бериш бўйича чоралар кўрдилар", дейилади хабарда.
Эслатиб ўтамиз, 2017 йилнинг 27 декабрь куни Санкт-Петербургдаги "Перекресток" дўконида портлаш содир этилди. Ушбу теракт натижасида жами 13 киши жароҳатланган бўлиб, олти киши касалхонага ётқизилган.
