ТОШКЕНТ, 21 апр — Sputnik. Cамарқанд вилояти Жомбой туманида 2017 йилнинг ўтган уч ойи давомида 58 та жиноят содир этилган бўлиб, жиноятчилик ўтган йилнинг шу даврига нисбатан 2 тага камайган. Бироқ жиноятларнинг фирибгарлик, гиёҳвандлик, одам ўлимига сабаб бўлган йўл-транспорт ҳодисаси билан боғлиқ турлари ошган.
Таъкидланишича, тумандаги маҳаллаларнинг 18 тасида жиноятлар содир этилган.
Айрим профилактика инспекторларининг малакасизлиги, ўзининг билим ва кўникмаларини ҳамда амалий тажрибасини оширишга истаги ва интилиши йўқлиги, ҳуқуқбузарликлар профилактикаси борасида давлат ва нодавлат идоралари билан ўзаро ҳамкорлик қилмаганлиги, шунингдек, қонун бузилиши ҳолатларига йўл қўйганлиги аниқланган.
Туманни ўрганиш жараёнида 329 та шаръий никоҳда бўлган оилалар аниқланган ва бу оилаларнинг қонуний никоҳдан ўтиши ҳамда фарзандларини туғилганлик гувоҳномалари билан тўлиқ таъминлашга эришилган.
Қайд этилган камчиликлар юзасидан мутасадди раҳбарлар тушунтириш беришган.
