TOШКЕНТ, 12 май — Sputnik. Ўзбекистон ИИВ матбуот-хизмати Фарғона политехника институтининг бир гуруҳ олимлари янги лойиҳа ишлаб чиққани ҳақида хабар берди.
Баъзан электр энергиясининг узилиб қолиши натижасида светофорлар ишламаслиги йўлда тирбандлик ҳосил бўлишига олиб келарди. Қизил чироқнинг яшилга, яшилнинг сариқ чироққа ҳеч бир огоҳлантиришсиз ўтиб кетиши ҳайдовчиларга ноқулайлик туғдирарди. Янги қурилма бундай камчиликларни бартараф қилишда ёрдам беради, дея таъкидланган хабарда.
Ер усти транспорти тизимлари ва уларнинг эксплуатацияси кафедраси мудири Маҳмуджон Турдиевнинг сўзларига кўра, қурилма электрон аккумулятор ва электр қутисидан ташкил топган. Электр токи паст кучланишда бўлганда ёки узилиб қолганда доимий ўзида йиғилган энергия билан таъминлайди.
Айтилишича, қурилма дастлаб вилоят ички ишлар бошқармаси ҳамкорлигида Фарғона шаҳар Ватанпарвар кўчаси чорраҳасидаги светофорга қўйилиб, синовдан ўтказилган. Ҳеч қандай камчиликлар аниқланмагач, Аҳмад Фарғоний, Аэропорт, Мустақиллик, Баҳор кўчалари чорраҳасидаги светофорларга қўйилиши белгиланган.
Йил якунига қадар 214 чорраҳадаги светофорлар қурилма билан таъминланиши режалаштирилган.
Бизнинг Telegramдаги ўзбекча каналимизга обуна бўлинг ва энг янги хабарларни биринчи бўлиб ўқинг.
