ТОШКЕНТ, 19 май — Sputnik. Шавкат Мирзиёевнинг китобини ўрганишга бағишланган тарғибот тадбирлари ўтказилаётгани ҳақида "Жаҳон" ахборот агентлиги хабар берди.
Қайд этилишича, Ўзбекистон Республикаси Маданият вазирлиги, Олий ва ўрта махсус, Халқ таълими вазирликлари, Ёзувчилар уюшмаси, Маънавият тарғибот маркази ва бошқа ташкилотлар ҳамкорлигида ташкил этилаётган тадбирларда китобда илгари сурилган ғоялар, давлат ва жамият ҳаётини янгилаш билан боғлиқ вазифалар ҳақида ҳаётий мисоллар асосида сўз юритилмоқда.
Нарпай туманидаги Оқтош тадбиркорлик ва сервис касб-ҳунар коллежида ташкил этилган учрашувда ҳудуддаги маҳаллалар вакиллари, ўқитувчи ва ўқувчилар қатнашди.
Таниқли адиблар, маданият ва санъат намояндалари, профессор-ўқитувчилардан иборат тарғибот гуруҳи аъзолари Ўзбекистонда инсон манфаатлари йўлида амалга оширилаётган ислоҳотлар самаралари, шаҳар ва қишлоқларимиздаги бунёдкорлик жараёнлари, ёшлар, хотин-қизлар манфаатларини ҳимоя қилиш борасида олиб борилаётган ишлар ҳақида маълумот берди.
Бу борада президент китобида белгилаб берилган устувор вазифалар юзасидан мулоҳазалар билдирилди.
Учрашувда маҳалла оқсоқоллари, зиёлилар сўзга чиқиб, аҳолининг тадбиркорлик ташаббуслари қўллаб-қувватланиши натижасида бугун қишлоқларда шахсий ёрдамчи хўжаликларда паррандачилик, чорвачилик изчил йўлга қўйилаётгани, одамлар ўз томорқасидан унумли фойдаланиб, даромад қилаётганини таъкидлади.
Бизнинг Telegramдаги ўзбекча каналимизга обуна бўлинг ва энг янги хабарларни биринчи бўлиб ўқинг.
