ТОШКЕНТ, 7 сен — Sputnik. Ўзбекистондаги хорижий мамлакатларнинг дипломатик ваколатхоналари ва консуллик муассасалари, шунингдек уларга тенглаштирилган ташкилотлар ходимларини йўл ҳаракати қоидаларини бузганлиги учун маъмурий жавобгарликка тортиш чора-тадбирлари соҳасида тегишли Йўриқномага ўзгартириш ва қўшимчалар киритиш тўғрисида қўшма қарор лойиҳаси тайёрланмоқда.
Ўзбекистон Республикаси Ташқи ишлар вазирлиги Ички ишлар вазирлиги ва Олий суд билан биргаликда хорижий мамлакатларнинг дипломатик ваколатхоналари ва консуллик муассасалари, шунингдек уларга тенглаштирилган ташкилотлар ходимларини йўл ҳаракати қоидаларини бузганлиги учун маъмурий жавобгарликка тортиш чора-тадбирлари соҳасида хорижий тажрибани ўрганиш асосида 2012-йил 12-мартда Ўзбекистон Республикаси ТИВ, ИИВ ва Олий суди томонидан тасдиқланган қўшма Қарорга тегишли Йўриқномага ўзгартириш ва қўшимчалар киритиш тўғрисида қўшма қарор лойиҳасини тайёрламоқда", — дейилади ТИВ хабарида.
Амалдаги хужжатни мамлакатда жорий этилган йўл ҳаракати қоидалари бузилганлигини қайд этувчи автоматлаштирилган видео-ёзув тизими билан боғлиқ меъёрлар билан тўлдириш кўзланмоқда.
Йўл ҳаракати қоидалари ва йўл ҳаракати иштирокчилари хавфсизлигига қатъий риоя этилишини таъминлаш мақсадида, шунингдек жазонинг муқаррарлиги тамойилидан келиб чиққан ҳолда суд ёки бошқа ваколатли органлар томонидан ҳуқуқбузарликни содир этганлиги учун маъмурий жазо қўлланилиши тўғрисидаги қарор қабул қилиш тартибига ўзгартиришлар киритилади. Бундан ташқари, дипломатик корпус вакилларига қулайликлар яратиш учун йўл ҳаракати қоидаларини бузганлик учун жаримани тўлаш шаклларини кенгайтириш режалаштирилмоқда.