ТОШКЕНТ, 21 дек — Sputnik. 2018 йилда Хоразмдаги мол-мулк солиғи Тошкентдагидан 2 марта кам бўлади, деб таъкидлади Ўзбекистон Бош вазирининг ўринбосари, Молия вазири Жамшид Қўчқоров Ўзбекистон Олий Мажлиси Сенатининг ўн учинчи ялпи мажлисидаги маърузасида. Sputnik Ўзбекистон мухбири хабари асосида.
Вазирнинг таъкидлашича, жисмоний шахслар мол-мулк солиғини 1991 йилда белгиланган индекс методи бўйича тўлаб келганлар. Шу боис кадастрлардаги уйнинг инвентар нархи бозор нархидан ўртача 20-25 марта кичиклигини кўриш мумкин.
"Масалан, пойтахтнинг Буюк Ипак Йўли кўчасида жойлашган, 1989 йилда қурилган 9 қаватли, бетондан қурилган кўп қаватли уйда 3 хонали хонадоннинг бугунги кундаги инвентар қиймати 11 миллион сўмни, кадастр қиймати 113 миллион сўмни ташкил этади. 2017 йилда мазкур хонадоннинг мол-мулк солиғи 190 минг сўмни ташкил қилган. Таклиф этилаётган тартиб бўйича ушбу хонадоннинг 2018 йилга ҳисобланадиган мол-мулк солиғи суммаси 227,3 минг сўмни ташкил этиб, 2017 йилдагига нисбатан 1,2 баробарга ўсиши кутилмоқда", — мисол келтирди вазир.
Вазир шунингдек, мол-мулк солиғи ставкаси камайтирилишини — у 1,7%дан 0,2 %га туширилганини маълум қилди.
"Фуқаролар тўлайдиган солиқ миқдори 20%дан ошмайди", — деб ишонтирди Қўчқоров.
Вазир шунингдек, алоҳида шахслар учун мол-мулк солиғи миқдори 30%га камайтирилиши ёки оширилиши мумкинлигини қўшимча қилди.
Бу кўрсаткич маҳаллий ҳокимият органлари томонидан белгиланиши маълум қилинди.
Мажлисда қайд этилишича, ҳозирда бу борада махсус тартиб ишлаб чиқилган. Вазирлар Маҳкамаси ишлаб чиқилган тартибни тасдиқлагач, бу борада тўлиқ ахборот солиқ тўловчиларга етказилади. Янги тартиб 2018 йилнинг январ ойидан кейин амалиётга киритилиши мўлжалланган.