ТОШКЕНТ, 24 июл — Sputnik. Ўзбекистон президенти Шавкат Мирзиёев Паркент тумани Гулистон маҳалласида яшовчи Аминжон ота Муҳаммаджоновнинг боғида бўлди, деб хабар қилинди Ўзбекистон Ҳукумати порталида.
Аминжон ота фарзандлари билан "Зуҳра она плюс" хусусий корхонасини ташкил этган. Маҳалладаги қарийб 3 гектар ерда манзарали дарахтлар ва буталар экиб, боғ яратган.
Ўзбекистон президенти боғни кириб кўрди. Шундай ажойиб боғ яратгани, хориждан кўчатлар олиб келиб, юртимиз шароитида кўпайтираётгани учун Аминжон бобога миннатдорлик билдирди.
"Одамнинг қўли гул дегани мана шу, — деди Мирзиёев. — Бу боғ Ватанни севишнинг, меҳнатсеварликнинг яққол намунаси. Отахоннинг тажрибасини ўрганиш, одамларга ибрат қилиб кўрсатиш керак. Бу киши қишлоқ хўжалиги соҳасидаги таълим муассасаларида дарс берсин, одамлар келиб бу ишларни ўргансин".
Президент боғда маҳалла фаоллари, нуронийлар билан суҳбатлашди.
Давлат сиёсатининг мазмун-моҳияти, мамлакатда амалга оширилаётган ислоҳотлар натижаси, Тошкент вилоятини ҳар томонлама ривожлантиришга қаратилган режалар ҳақида сўз юритилди.
Нуронийлар халқ билан мулоқот қилиб, инсон манфаатларини таъминлашда шахсан намуна бўлаётгани, Тошкент вилоятини ривожлантириш, одамлар турмуш фаровонлигини оширишга қаратаётган эътибори учун Мирзиёевга миннатдорлик билдирди.
