ТОШКЕНТ, 8 сен — Sputnik. Ўзбекистон Ички ишлар органлари ходимлари Хитойда малака оширадилар. Бу ҳақда Ўзбекистон ИИВ матбуот-хизмати хабар берди.
Мулоқот аввалида Сун Лицзе элчихонанинг янги тайинланган ХХР Жамоат хавфсизлиги вазирлиги расмий вакили Лю Тунпинни таништирди.
Томонлар мамлакатлар ўртасида турли ижтимоий соҳаларда, шунингдек хавфсизликни таъминлаш масалаларида ўзаро фойдали муносабатлар тобора тараққий этиб бораётганини таъкидладилар.
Учрашувда томонлар икки мамлакат ҳуқуқни муҳофаза қилиш органлари ўртасидаги ҳамкорликни янада ривожлантириш бўйича ўзаро фикр алмашишди. Жумладан, Ўзбекистон ички ишлар органлари ходимларини Хитойда ўқитишни давом эттириш, турли йўналишларда осойишталик посбонлари учун малака ошириш курсларини ташкил этиш мақсадида ХХР етакчи мутахассисларининг Ўзбекистонга ташрифи бўйича таклифлар билдирилди.
Ўзаро ишонч руҳида ўтган музокаралар чоғида томонлар икки томонлама ҳамкорликни мустаҳкамлашга, ўзаро манфаатли масалалар бўйича доимий алоқа ўрнатишга ва мунтазам равишда ахборот алмашиб туришга келишиб олдилар.
Учрашув якунида элчихонанинг ХХР Жамоат хавфсизлиги вазирлиги расмий вакиллигида ўз фаолиятини якунлаган Нашуньбаярга ва янги тайинланган Лю Тунпинга миллий урф-одатларга мос равишда илтифот кўрсатилди, дейилади хабарда.
