Мирзиёев бир гуруҳ ўқитувчиларни мукофотлади

ТОШКЕНТ, 28 сен — Sputnik. Ўқитувчи ва мураббийлар куни муносабати билан таълим-тарбия тизимида алоҳида ўрнак кўрсатган ходимлардан бир гуруҳини мукофотлаш тўғрисида Ўзбекистон президенти фармони эълон қилинди.

Унвонлар Ўзбекистонда ёш авлоднинг интеллектуал ва маънавий салоҳиятини юксалтириш, таълим тизимини замон талаблари асосида такомиллаштириш, соҳага доир ислоҳотларни муваффақиятли амалга ошириш ишларига қўшган салмоқли ҳиссаси, ёшларга илм-фан асослари ва замонавий касб-ҳунарларни ўргатиш, уларни она Ватанга муҳаббат, истиқлол ғояларига садоқат руҳида тарбиялаш борасидаги кўп йиллик фидокорона хизматлари ҳамда ижтимоий ҳаётдаги фаол иштироки учун берилган.

"Ўзбекистон Республикаси халқ ўқитувчиси" унвони билан:

Шаҳрисабз туманидаги 78-умумий ўрта таълим мактабининг бошланғич синф ўқитувчиси Вохидова Назокат Шариповна.

Самарқанд шаҳридаги 6-умумий ўрта таълим мактабининг математика фани ўқитувчиси Гафарова Фируза Джалаловна тақдирланган.

"Ўзбекистон Республикасида хизмат кўрсатган халқ таълими ходими" унвони:

Фарғона вилояти Тошлоқ туманидаги 1-ихтисослаштирилган умумий ўрта таълим мактаб-интернатининг физика фани ўқитувчиси Марахимов Икрамжон Абдурахимовичга;

Сурхондарё вилояти Ангор туманидаги 8-умумий ўрта таълим мактабининг она тили ва адабиёт фани ўқитувчиси Шапулатов Зиядулла Ишкуловичга берилган.

Тақдирланганларнинг тўлиқ рўйхати билан қуйида танишишингиз мумкин.