ТОШКЕНТ, 15 дек — Sputnik. Ўзбекистонда Ватан ҳимоячилари кунида вилоятлар марказлари ва Тошкентнинг марказий кўчалари бўйлаб ҳарбий техника намойиши ва ҳарбий оркестр марши бўлиб ўтади, деб хабар қилди Спутник Ўзбекистон мухбири.
Мудофаа вазирлиги матбуот анжуманида Ўзбекистон Қуролли Кучлари ташкил этилганининг 26 йиллиги ва Ватан ҳимоячилари куни 2018 йилда янги шаклда ўтказилиши маълум қилинди.
Уларда ҳарбий техника, қурол-яроғ намойиши, ҳарбий оркестрлар концертлари, ҳарбий хизматчиларнинг қўл жанги элементлари билан кўргазмали чиқишлари, шунингдек "Ватанпарвар" клубларининг ҳарбий-техника ва спорт имкониятлари тақдимотлари ўтказилади. 10-15 январь кунларида Тошкент ва вилоятлар марказларининг асосий кўчалари бўйлаб ҳарбий хизматчиларнинг тантанали марши — "Ҳарбий оркестрлар мусиқаси" бўлиб ўтади. Бундан ташқари, ёшлар ва ҳарбий хизматчилар иштирокида спорт марафонлари бўлиб ўтади.
Ёшларни ҳарбий ватанпарварлик руҳида тарбиялаш бўйича тадбирлар ўтказиш режалаштирилган. 15 январь куни ОТМлар, лицейлар, коллежлар ва мактабларда ҳарбий хизматчилар ва Қуролли Кучлар фахрийлари иштирокида жасорат дарслари ўтказилади.
Декабрь ва 2018 йил давомида ҳарбий қисмлар, олий ҳарбий таълим муассасалари, сержантлар тайёрлаш мактабларида ёшлар учун очиқ эшиклар кунлари ўтказилиши кутилмоқда.
