Тарихий мурожаатномадан иқтибослар

ТОШКЕНТ, 24 дек — Sputnik. Ўзбекистон президентини у айтган айрим жумлаларидан кейин залдагилар гулдурос қарсаклар билан олқишладилар. Таъкидлаш жоизки, Мирзиёев ўз нутқи давомида, тадбиркорлар ҳақида гапирар экан жаҳонниннг энг ақлли кишиси ва сиёсатчиси сифатида ном қозонган Уинстон Черчиллдан иқтибос келтирди.

Қуйида эътиборларингизга Ўзбекистон раҳбари томонидан тилга олинган энг ақлли, энг жўшқин, халқ дардини ўз ичига мужассам қилган "халқона" ёрқин жумлаларни эътиборингизга ҳавола қиламиз.

— "Қоғозда юзлаб масалалаларни ҳал қилгандан кўра, амалда бир нечта масалаларни ҳал қилсангиз, халқ сиздан рози бўлади"

— "Қишлоқда тўйда (тўрда) ким ўтиради? Аввал "коттакон"лар, кейин БТИ"

— "Гази бўлмаса, свети бўлмаса, буни устига боғча ҳам бўлмаса… У тўрт фарзандли онамиз қаёққа борсин?"

— "Биз 25 йил давомида илм билан шуғулланмадик, биз бор илмни йўқ қилдик"

— "Менга тажриба керак эмас, менга миллатни севадиган одам керак"

— "Ўлик қонунлар кимга керак? Бизга одамларни рози қиладиган қонунлар керак. Қонун қабул қилиш амалиётини қайта кўриб чиқамиз!"

— "Острогорский биладими Қорақалпоғистондаги шароитни? Сариосиёнинг совуғида Острогорскийга ўхшаганлар яшаб кўрганми?!"

— "Ҳокимни обрўйи — давлатни обрўйи, битта погон кийганники эмас…"

— "Ниҳол" мукофоти керакдир-ку, лекин менга китоб ўқийдиган кўпроқ керак"

— "Спорт сиёсатга айланиб кетган бир вақтда сиёсатсиз спортни намуна қилмоқчимиз"

— "Шу пайтгача ногиронларни яшириб юрдик-ку!"

— "Кечаги депутат бугунги депутат бўлишга ҳаққи йўқ. Депутатлар қандайдир иш қилди, деган гапни эшитганимиз йўқ. Депутатлар уйғониши керак! Уйғониши шарт!"

— "Мен ер тагида илон қимирласа биламан. Мен 13 йил Бош вазир бўлиб кабинетни қоровуллаб ўтирганим йўқ

— "Энг катта вабо — бу судларда!"

— "Ҳуқуқ-тартибот органлари ходимлари яхши билиб олсин: текшир-текшир ва деди-деди қабилидаги гаплар асосида жавобгарликка тортишдан халқимиз қаттиқ чарчаган. Ваколат доирасидан чиқиб, барча соҳаларга аралашиш, Ватан ва халқ манфаати бир четда қолиб, ўз манфаати йўлида идора номини рўкач қилиш даври ўтди энди. Районда ёки вилоятда ўтирган раҳбарлар — прокурори, мелисаси солиқчиси ва миллий хавфсизлик хизмати раҳбари ҳам гапларимни ёзиб олсин —идорани номи билан ғўддайиб юриш вақти ўтди! Энди бирорта фуқаро қалбаки далиллар, туҳмат ва бўхтонлар асосида жавобгарликка тортилмаслиги шарт. Ҳар бир ҳуқуқни муҳофаза қилиш органига конституциявий чегара бор, тамом. Конституцияни бузишга ҳеч кимнинг ҳаққи йўқ. Конституцияни бузишга менинг ҳам ҳаққим йўқ. Замон ўзгарди энди, ҳамма ўзини иши билан шуғулланиши керак"

Ўз нутқи давомида, Мирзиёев "мен айтмасам бу гапларни, ҳеч ким ҳеч қачон сизларга айтмайди" деди. Президент ҳақ. Ҳозирча "халқ ноиби" бўлмиш депутатлардан ҳам халқ дардини енгиллаштирадиган юқоридаги сингари фикрларни эшитганимиз йўқ.