ТОШКЕНТ, 1 мар — Sputnik. Тошкентнинг Муқимий ва Бунёдкор кўчалари кесишмасида йўл ўтказгич қурилиши муносабати билан 11 февраль куни ёпилган чорраҳанинг транспорт ҳаракати учун очилиши 2017 йил 10 мартга кўчирилди, деб хабар қилди "Тошшаҳартрансхизмат" матбуот-хизмати.
"Муқимий ва Бунёдкор кўчалари кесишмасида йўл ўтказмаси қурилиши муносабати билан ёпилган чорраҳанинг транспорт ҳаракати учун очилиши 2017 йил 10 мартга кўчирилди. Тирбандликни келтириб чиқармаслик мақсадида, сизлардан қурилиш вақтида бошқа кўчалардан фойдаланишингизни сўраймиз. Юзага келтирилган ноқулайликлар учун узр сўраймиз", — дейилган хабарда.
Илгарироқ бу чорраҳа 23 февралгача ёпилгани маълум қилинганди. Аммо кейин унинг очилиш муддати 1 март кунига кўчирилган эди.
Бунёдкор ва Муқимий кўчалари кесишувида, метронинг "Новза" бекати яқинида узунлиги 600 метрга тенг бўлган, олти қатор йўл тушадиган янги кўприк қурилиши 2016 йилнинг 16 сентябридан бошланган эди.
Йўл ўтказгич Наврўз байрами (21 март)да фойдаланишга топширилиши кутилмоқда.
