ТОШКЕНТ, 30 мар — Sputnik. Ўзбекистонга учинчи "Афросиёб" электропоездининг олиб келинганлиги муносабати билан жорий йилнинг 10 апрелидан бошлаб Тошкент-Самарқанд-Тошкент йўналишида ҳам юқори тезликда ҳаракатланувчи электропоездларнинг мунтазам қатнови йўлга қўйилади. Шу сабабли "Афросиёб" электропоездларининг ҳаракатланиш вақтига ўзгартиришлар киритилди, деб ёзади uz24.uz.
Хабарга кўра, Тошкент-Қарши-Тошкент йўналишида 760/759 сонли "Афросиёб" электропоезди куннинг биринчи қисмида эрталаб соат 7:00 да Тошкент марказий вокзалидан манзил томон ҳаракатланса, куннинг иккинчи қисмида соат 16:48да Қарши вокзалидан ортга қайтади.
Тошкент-Бухоро-Тошкент йўналишидаги 762/761 сонли электропоезд соат 7:30 да пойтахтдан Бухоро томон ҳаракатни бошлаб, шу куни 15:51да ортга қайтади.
Тошкент-Самарқанд-Тошкент йўналишида йўлга қўйилган 764/763 сонли юқори тезликдаги "Афросиёб" эса эрталаб соат 8:00да вокзалдан жўнаб, куннинг иккинчи қисми 17:00 да Тошкентга қайтади.
Шунингдек, 10 апрелдан бошлаб, Тошкент-Бухоро йўналишидаги "Sharq", Тошкент-Қарши йўналишидаги "Registon" ҳамда 380/379 сонли Тошкент-Термиз йўналишидаги йўловчи поездлар ҳаракатланиш вақтига ҳам ўзгартиришлар киритилди.
Бу борада белгиланган ўзгаришларни www.railpass.uz веб-сайтидан билиб олиш мумкин.
"Ўзтемирйўлйўловчи" АЖ Тошкент-Бухоро-Тошкент йўналишидаги "Афросиёб" электропоездига 10 апрель санасидан кейинги қатнов кунларида чипта харид қилган йўловчиларга шу кундан бошлаб поезд Бухорога 8:00 да эмас балки 7:30 да ҳаракатланишини маълум қилади. Харид қилинган чипталарни чиптахонадан алмаштирмасдан туриб янги кўрсатилган вақтда фойдаланиш мумкин.