ТОШКЕНТ, 16 апр — Sputnik. Ўтган йилнинг 5 октябр куни Шавкат Мирзиёев Самарқандда йўловчи транспорти тизимини ривожлантириш мақсадида шаҳарда травмай йўллари қуриш зарурлигини таъкидлаган эди.Орадан ярим йил ўтиб Самарқандда янги йўловчи транспорт тизимининг биринчи навбати ишга тушди.
Икки томонлама қатновга мўлжалланган йўлда электр билан таъминловчи тўртта подстанция ва битта депо қурилди. Темир йўл вокзали билан Сартепа оралиғидаги 6,4 километрлик йўналишда 8 трамвай ҳаракатланади.
Шавкат Мирзиёев 15 апрел куни Самарқандга бўлган ташрифи давомида, шаҳарда ишга туширилган трамвайнинг биринчи йўловчилари қаторида бўлди. Президент "Тарих музейи" бекатидан "Темир йўл вокзали" бекатигача вилоят фаоллари билан бирга трамвайда келди.
Келажакда Самарқандда яна учта йўналиш бўйича трамвай қатнови йўлга қўйилиши режалаштирилган. Трамвай йўллари Темир йўл вокзали, Сиёб деҳқон бозори, Кимёгарлар мавзеи каби аҳоли кўп яшайдиган ҳудудларни шаҳарнинг энг гавжум марказий ҳудудлари билан боғлаши керак.
