ТОШКЕНТ, 14 ноя — Sputnik. Жасурбек Иброҳимовнинг ўлимида айбдор деб топилган Исломбек Тўлагановнинг адвокатлари қайта тергов ўтказилишини талаб қилишмоқда ва жиноят ишлари бўйича Тошкент шаҳар судига апелляцион шикоят жўнатишди, деб ёзади NUZ.UZ.
Апелляция шикоятида судланувчининг ҳимояси Миробод тумани суди қарорига қўшилмаслиги ва юқори инстанцияга шикоят қилиши билдирилган.
Юристлар қайта суд суриштируви ўтказилишини ва ҳимояси остидаги шахсга нисбатан чиқарилган ҳукм ўзгартирилишини талаб қилишмоқда. Улар бўлиб ўтган воқеада жанжални бошлаган марҳум Жасурбек Иброҳимов ҳамда унинг ҳаётини сақлаб қололмаган шифокорлар айбдор деб ҳисоблашмоқда.
Жиноят ишлари бўйича Тошкент шаҳар судида 1 декабрь куни апелляция шикоятини кўриб чиқиш бўйича биринчи мажлис бўлиб ўтади.
Жабрланувчи томон ҳам тез орада жанжалнинг бошқа иштирокчиларига нисбатан жиноят иши қўзғатиш борасида прокуратурага ҳужжат топширади.
Эслатиб ўтамиз, 30 октябрь куни жиноят ишлари бўйича Миробод туман суди Боровский номли коллеж талабаси Жасурбек Иброҳимовнинг ўлими юзасидан ҳукм эълон қилди. Ушбу ишда асосий гумондор бўлган Исломбек Тўлаганов Жасур Иброҳимовга ўлимга олиб келувчи оғир тан жароҳати етказишда айбдор деб топилиб, олти йил муддатга умумий тартибдаги колонияда жазо муддатини ўташга ҳукм қилинди.
