ТОШКЕНТ, 26 дек — Sputnik. Суд қарори билан Андижон шаҳар ҳокими Дилмурод Раҳматуллаев Ўзбекистон Маъмурий жавобгарлик тўғрисидаги кодекснинг 41-моддасида назарда тутилган маъмурий ҳуқуқбузарликни содир этганликда айбдор деб топилиб, энг кам иш ҳақининг 30 баравари миқдорида жарима жазоси қўлланилди. Бу ҳақда Ўзбекистон Бош прокуратураси матбуот хизмати хабар бермоқда.
"Текшириш давомида вилоят прокуратураси томонидан киритилган тақдимнома асосида халқ депутатлари Андижон шаҳар Кенгаши томонидан Д.Раҳматуллаевни маъмурий жавобгарликка тортишга розилик бериш тўғрисида қарор қабул қилинган", дейилади хабарда.
Эслатиб ўтамиз, Андижон шаҳар ҳокими Д.Раҳматуллаев шу йилнинг 16 октябрь куни шаҳардаги бир қатор таълим муассасалари раҳбарларини ножўя сўзлар билан ҳақорат қилганлиги ёзилган аудиоёзув интернетда тарқалган ва бу ҳолат юзасидан Андижон вилоят прокуратураси томонидан текшириш бошланганлиги хабар берилганди.
