ТОШКЕНТ, 18 июл — Sputnik. Туркиядаги ҳарбий тўнтаришнинг олди олинди, аммо хавф тўлалигича бартараф этилгани йўқ, дея баёнот қилди Туркия Мудофаа вазири Фикри Ишик душанба куни. РИА Новости хабари асосида.
Ишикнинг сўзларига қараганда, Туркия кўплаб тўнтаришларни бошдан кечирган, "аммо бу галгиси кишини ғазаблантирадиган хоинлик актидан бошқа нарса эмас. "Ҳатто чет эллик босқинчилар ҳам турк халқини осмондан туриб вертолёт ва самолётлар ёрдамида бомбардимон қилмаган".
Эслатиб ўтамиз, ўтган ҳафта 15 июлдан 16 июлга ўтар кечаси Туркия ҳарбий қўмондонлиги мамлакатда ҳукумат уларнинг қўлига ўтганини эълон қилган эди. Аммо бир кун ичида Туркия ҳукумати ушбу ҳарбий исённи бостиришга муваффақ бўлди ва бу ҳақда телеэфир орқали маълум қилди.
Энг сўнгги хабарларга кўра Тойиб Эрдўғон саройига қилинган ҳужумда — ҳарбий исёнда қатнашган 750 ҳарбий ҳибсга олинган ва унвонларидан маҳрум қилинган, улар орасида 5 нафар генерал ва 29 нафар полковник бор.
Хабарларга кўра, давлат тўнтаришини амалга оширишга уриниш ҳаракатлари оқибатида 290 киши ҳалок бўлган. Туркия ҳукумати АҚШда истиқомат қилаётган ислом тарғиботчиси Фатхулла Гюленни ушбу исённи ташкил қилганликда айбламоқда.
