ТОШКЕНТ, 27 фев – Sputnik. Женева қўмитаси Сурияда фаолият юритувчи террорчилик уюшмалари рўйхатини тузиш борасида ишни охирига етказгани йўқ, деб хабар қилди Сурия Араб Республикасининг БМТдаги доимий вакили Башар Жафарий, РИА Новости хабари асосида.
"Женева қўмитасига Суриядаги “Ислом давлати” ва “Жабҳат ан-Нусра”дан ташқари мавжуд бўлган террорчилик уюшмалари рўйхатини тузиш топшириғи берилган эди. Айни вақтгача бу иш якунига етказилмади”, — деди Жафарий Sputnik агентлигига.
БМТ Хавфсизлик кенгаши Сурияда жанговор ҳаракатлар тўхтатилиши тўғрисидаги келишув кучга киришидан бир соат олдин 27-феврал қоқ ярим тундан бошлаб мамлакатда тинчлик тартиби ўрнатилганлигини қайд этган 2268 рақамли резолюцияни қабул қилди.
“Тинчлик сулҳи” Сурияда мавжуд бўлган “Ислом давлати” ва “Жабҳат ан-Нусра” террорчилик уюшмаларига жорий этилмаслиги таъкидлаб ўтилди. Уларга қарши ҳарбий ҳаракатлар давом этади.
Сурия ҳукумати ўт очишни тўхтатиш борасида Россия ва АҚШ ўртасида келишилган битимга ўз розилигини билдирди. Айрим муҳолифат кучлар бу битимга ишончсизлик билан қараган бўлса-да, аммо жанговор ҳаракатларни тўхтатиш ғояси Сурия ҳукуматига қарши кучлар томонидан ҳам маъқулланди: Россия давлати Мудофаа вазирлиги генерал-майори Игорь Конашенконинг сўзларига қараганда, ушбу битим эълон қилинган куннинг ўзидаёқ тинчлик ўрнатилишига рози бўлган томонлардан ўнлаб мурожаатлар келиб тушган.
Россия ТИВ раҳбари ўринбосари Михаил Богданов эса “Тинчлик битими”га қўшилмайдиганлар Россия ва АҚШ томонидан бомбардировка қилиниши мумкинлигини таъкидлади.
