ТОШКЕНТ, 30 мар — Sputnik. 2016-йилнинг 30-март куни Ташқи ишлар вазири Абдулазиз Камилов Ўзбекистонга икки кунлик расмий ташриф билан келган Германия Федератив Республикаси Федерал ташқи ишлар вазири, Европада хавфсизлик ва ҳамкорлик ташкилотининг (ЙХҲТ) амалдаги раиси Франк-Валтер Штайнмаер билан учрашди, деб хабар қилинади Ўзбекистон ТИВ расмий сайтида.
"Ташқи сиёсий идоралар раҳбарлари икки томонлама ҳамкорликнинг турли жиҳатларини муҳокама қилишди ҳамда минтақавий ва халқаро сиёсатга оид айрим муаммолар юзасидан фикр алмашишди", — дейилади хабар матнида.
Суҳбат чоғида айни пайтда Германия раислигидаги ЙХҲТ кун тартибининг долзарб масалаларига, шунингдек Ўзбекистон ва Германиянинг ушбу ташкилот доирасидаги ўзаро ҳамкорлигининг ҳозирги ҳолати ва истиқболларига алоҳида эътибор қаратилгани таъкидланмоқда.
Учрашувда, шунингдек, Германия Элчиси Наитҳарт Хёфер-Виссинг қатнашган.
