ТОШКЕНТ, 7 апр – Sputnik, Алена Палажченко. Туркия президенти Тойиб Эрдўғон Европа Иттифоқини Анқара билан қочоқлар борасида тузилган шартномага амал қилмаётганликда айбламоқда. "ЕИ берган ваъдаларга амал қилмаяпти, Туркия ҳам худди шундай қилади", — деб таҳдид қилди Эрдўғон, РИА Новости хабари асосида.
"Туркия давлат бюджети ҳисобидан уч миллионга яқин одамлар (суриялик қочоқлар, — таҳр.) таъминланмоқда. Европа ваъда қилган пуллардан эса ҳамон дарак йўқ. Агар Европа Иттифоқи берган ваъдасида турмаса, Туркия ҳам бу битимга амал қилмайди. Иқтисодий жиҳатдан биздан устун бўлган давлатлар одамийлик муносабатларини кўрсатганлари йўқ”, — деб таъкидлади Эрдўғон Анқарада полициячилар билан учрашуви чоғида.
Туркия президенти ЕИ миграция масаласини ҳал этиш учун, Туркия суриялик қочоқларни ўз бағрига олиши учун олти миллиард евро ажратиши лозимлигини эслатиб ўтди.
