Туркия оппозиция кучлари мамлакатларни Эрдўғон билан ҳамкорликдан воз кечишга чақирмоқда

ТОШКЕНТ, 23 май – Sputnik. "Халқаро ҳамжамият Туркия президенти Тойиб Эрдўғон режими билан ҳамкорлик қилишдан воз кечиши лозим, акс ҳолда, улар Туркия раҳбарининг нопок ва қонли ишларига шерик бўлган ҳисобланади", деб таъкидлади Халқлар демократияси Туркия муҳолифат партияси раисдоши Фиген Юксакдоғ, РИА Новости хабарига кўра.

Юксакдоғ, RT телеканалига берган интервьюсида, шунингдек, расмий Анқара ҳамкорлари Эрдўғоннинг ҳатти-ҳаракатларига кўпинча кўз юмиб келган ва бу билан, унинг жиноятларни қўллаб-қувватлаб келишганини айтди.

"Уларни Туркия билан турли хилдаги ҳамкорлик муносабатлари ва келишувлар боғлаб туради. Улар Анқара билан ҳамкорлик қилишдан воз кечмоқлари лозим. Чунки мамлакталар қўли қонга беланган сиёсий режим билан ҳамкорлик қилиш баробарида, унинг нопок ва қонли ишларига шерик бўлишмоқда”, — деб таъкидлади мухолифат вакили.

Туркия мухолифат вакиллари шунингдек, кўп йиллардан бери Эрдўғон режимининг террорчилар, жумладан, “ИД” террорчилик уюшмаси билан алоқаси ҳақида огоҳлантириб келишганини, аммо бунга ҳеч ким қулоқ тутмагани ҳақида айтишди. "Биз бу ҳақда йиллар давомида гапириб келганмиз, аммо, Туркияда қонунлар тизими ишламайди, ҳукуматга таъсир ўтказиш механизмлари мавжуд эмас. Биз ҳукуматимизни бунга жавоб беришга чақиришга ҳаракат қиляпмиз, шу боис ҳам бизни таъқиб остига олишмоқда, қамашяпти, депутатлик даҳлсизлигидан маҳрум қилиб, парламентдан қувиб солишяпти”, — деб таъкидлади Юксакдоғ.

Туркия ва "ИД" террорчилари ўртасида нефт борасида олди-берди борлиги ҳақида Греция, Россия ва Исроил мудофаа вазирлари ҳам айтиб келишган.