ТОШКЕНТ, 4 июн — Sputnik. Тошкентда 23-24 июн кунлари ШҲТ саммити бўлиб ўтиши кутилмоқда. Саммит олдидан Тошкентда марказий кўчаларини кенгайтириш, Олой бозорини янгилаш ишлари авжида.
Sputnik мухбири хабар беришига кўра, Тошкент марказий кўчаларининг устки қопламини янгилаш ва кенгайтириш ишлари олиб борилмоқда. Кўчалар билан бир қаторда, уларга яқин бўлган ҳудулар ҳам ободонлаштирилмоқда.
Бир тарафдан бу кутилаётган нуфузли меҳмонлар олдида Республика обрўсини кўтарса, иккинчи тарафдан меҳмонлар кетганидан кейин аҳоли учун хизмат қилади. Шаҳар кўчаларининг баъзилари бир неча йилдан бери таъмирлаш талаб қилаётган эди, меҳмонлар туфайли улар ҳам обод бўлиб қолса — яхши-да албатта.
Масаланинг иккинчи томони эса, бугунги кунда ёппасига олиб борилаётган таъмирлаш ишлари шаҳарнинг бир неча гавжум кўчаларини вақтинча ёпишга олиб келди. Бу албатта, маҳаллий аҳоли учун транспорт тирбандлиги ва бошқа ноқулайликлар туғдиради.
Ноқулайлик имкон қадар камроқ бўлиши учун, маҳаллий ҳукумат таъмирлаш ишлари бошланишидан бир неча кун олдин керакли чораларни кўрган. Ёпиладиган кўчалар рўйхати теле ва радио эфир орқали эълон қилиниб, одамларни шахсий уловларини уйда қолдириб жамоат транспортидан фойдаланишга ва вақтинча юриш мумкин бўлган айланма йўллар ҳақида ҳам хабар берилган. Ушбу ноқулаликлар учун маҳаллий аҳолидан узр ҳам сўрашган, албатта.
Cабрнинг таги соф олтин деганларидек, барча таъмирлаш ишлари 10 июнга қадар якунланиши керак, ундан кейин эса, аҳоли янги асфальт ётқизилган, атрофлари ободонлаштирилган ойнадек текис йўллардан — маза қилиб фойдаланади, худо хохласа.
Йўлдан ташқари Тошкент марказидаги меҳмонлар бориши мукин бўлган жойлар ҳам янгиланмоқда. Улардан бири — Олой бозори.
Эски олий бозори собиқ Иттифоқ даврида учбурчик шаклидаги бетон устунлардан қурилган ва уни Ўзбекона ёки шарқона услуб деб бўлмасди. Шунинг учун ҳам уни бутунлай бузиб ташлаб янги бозор биноси қурилиши бу шаҳар кўркига кўрк қўшади. Айтишларига қараганда, янги Олой бозори биноси қадимий шарқона усулда бўлиб нақшинкор ёғоч устунлар билан безатилар экан. Бу албатта бозор кўркига кўрк қўшади ва меҳмонларга ҳам аҳолига ҳам хуш ёқиши керак.
Ундан Ташқари яқин кунлар ичида Тошкентда Бахт кўлида янги истироҳат боғи ва пляж ишга тушиши кутилмоқда, хуллас, Тошкент кўрки очилмоқда.
