ТОШКЕНТ, 13 июн — Sputnik. Орландодаги тунги клубда отишма содир этган Омар Матин, салга ловуллаб кетадиган феъл-атворга эга бўлган ва АҚШга Ўзбекистондан келган хотинига кўплаб маротаба қўл кўтарган. Бу ҳақда қотилнинг ўзбекистонлик собиқ рафиқаси сўзлаб берди.
РИА Новостининг хабар беришича, аёл Ўзбекистон фуқароси. Матин билан у интернет орқали танишган ва Флоридага боришга аҳд қилган. Жуфтлик 2009 йилда ўз муносабатларини расмийлаштирган.
“У кўринишидан бошқалардан фарқ қилмасди”, — деб ҳикоя қилади аёл эри билан яшаган йилларини эсга олар экан. Аёл собиқ турмуш ўртоғи “ичимдагини топ” дейдиганлар хилидан бўлганини айтди. Аёлнинг ҳикоясига қараганда, Матин диндор бўлмаган, вояга етмаганлар учун мўлжалланган аҳлоқ тузатиш муассасасида посбон бўлиб ишлагани ва тез-тез машғулотлар залига қатнаб турган.
Тўйдан сўнг бир неча ой ўтгач, Матиннинг кирдикорларидан хабар топган қизнинг ота-онаси ўз фарзандини уйларига олиб кетишган. 2011 йилда эса жуфтлик расман ажрашади. Матиннинг оиласи АҚШга Афғонистондан кўчиб келшган, аммо Омарнинг ўзи Нью-Йоркда туғилган.
Эслатиб ўтамиз, Омар Матин томонидан Орландодаги тунги клубларнинг бирида уюштирилган отишма туфайли 50 киши ҳалок бўлди, яна 53 нафари жароҳатланди. Матиннинг ўзи штурм вақтида полициячилар томонидан йўқ қилинди. Орландодаги отишма қурбонлар сони жиҳатдан АҚШ тарихида юз берган шу турдаги энг йирик фожиага айланди.
