ТОШКЕНТ, 26 июл — Sputnik. Бишкек шаҳри марказида, Максим Горький номидаги скверда 700 га яқин киши намойишга чиқди, деб хабар қилмоқда Спутник Қирғизистон нашри.
Милициядан олинган хабарларга кўра, митинг иштирокчилари ҳукуматдан уларни имтиёзли турар-жойлар билан таъминлашни талаб қилишмоқда. Акция ташаббускорлари ҳақида ҳозирча ҳеч қандай маълумот йўқ.
Ҳодиса жойига ҳуқуқни муҳофаза қилиш органи ходимлари етиб боришгани айтилмоқда. Митингда иштирок этганларнинг айримлари ҳибсга олиниб, милиция бўлимига олиб кетилган.
Сўнгги маълумотларга кўра, митинг давомида жамоатчилик тартибини бузганлиги учун 10 киши қўлга олинган. Бишкек шаҳри ИИБ матбуот-хизмати раҳбари Олжобай Казабаевнинг сўзларига кўра, митинг иштирокчиларига қарши маъмурий акт тузилади.
