ТОШКЕНТ, 9 сен — Sputnik. Ўзбекистон президенти сайловига номзодларни кўрсатиш 30 сентябрда бошланади ва 20 октябрда ниҳоясига етади, деб маълум қилди Ўзбекистон Марказий сайлов комиссияси раиси Мирзо-Улуғбек Абдусаломов журналистларга.
Илгарироқ Абдусаломов Ўзбекистон президенти сайлови 4 декабрда бўлиб ўтишини маълум қилганди.
"30 сентябрдан 20 октябрга қадар сайлов қонунчилигига асосан номзодларни рўйхатга олиш жараёни бўлиб ўтади", — деди Абдусаломов.
Марказий сайлов комиссияси мажлисида президент сайловларига тайёргарлик кўриш ва уни ўтказиш бўйича Асосий тадбирлар дастури ҳам тасдиқланди.
Мажлисда сайловга тайёргарлик кўриш ва уни ўтказиш билан боғлиқ барча тадбирлар Марказий сайлов комиссияси, тузиладиган сайлов комиссиялари томонидан очиқ ва ошкора, «Ўзбекистон Республикаси Президенти сайлови тўғрисида»ги Қонунга тўлиқ мувофиқ ҳолда амалга оширилиши таъкидланди.
