ТОШКЕНТ, 10 сен — Sputnik. Cамарқанд божхоначилари учувчисиз учар қурилмаларни олиб кириш бўйича 6 та ҳолатни аниқлади, деб хабар қилади "Зарафшон" нашри.
Фақатгина Вазирлар Маҳкамасининг 2016 йил 12 майдаги қарори билан зарурат туғилган ҳолларда айрим ҳуқуқни муҳофаза қилувчи давлат органлари мазкур қурилмаларни республикамизга олиб кириш, реализация қилиш ва фойдаланишига рухсат берилиши кўзда тутилган.
"Аммо бугунги кунда вилоятимизда яшовчи айрим фуқаролар томонидан чет элга вақтинча ишлаш ёки сафарга бориб қайтаётганларида яқинлари ва фарзандларига болалар учун ўйинчоқ сифатида қайд этилган кузатув камерали ва камерасиз учувчисиз учиш аппарат (дрон)ларини олиб келиш ҳолатлари кўпайган.
"Масалан, жорий йилнинг 1 июль куни "Внуково – Самарқанд" йўналишида келган фуқаро А.Раҳматовга тегишли бўлган қўл юклари божхона кўригидан ўтказилганда "Йўловчи божхона декларацияси"да кўрсатилмаган 1 дона учувчисиз учиш аппарати борлиги аниқланган.
Аниқланган ҳолатлар юзасидан божхона органи томонидан маъмурий ишлар юритилиб, суд қарори билан қурилмалар давлат фойдасига мусодара қилинди ва ҳуқуқбузарларга жарималар қўлланилди".
