ТОШКЕНТ, 12 сен — Sputnik. Ўзбекистон пойтахтида жамоат жойларида тамаки чекканлик учун жарима солинмоқда. Бундай жарима жазоси Маъмурий жавобгарлик кодексига ўтган йилнинг охирида киритилган, бироқ амалиётда энди қўлланилмоқда, деб хабар беради Nuz.uz.
Нашрнинг хабар беришича, Тошкентнинг Миробод туманида тамакига қарши кенг миқёсдаги рейд ўтказилган. Жамоат жойларида тамаки чекаётган бир неча шахс ҳуқуқни муҳофаза қилиш ходимлари томонидан жаримага тортилган.
Кашандаларнинг ўзлари янги қонун ҳақида билсалар ҳам бундай кескин чораларни кутишмаган.
Жамоат жойларида тамаки маҳсулотлари истеъмол қилганлик учун жарима қўллаш ўтган йилнинг 30 декабридан кучга кирганди. Унга кўра иш жойлари, соғлиқни сақлаш, таълим ва спорт-соғломлаштириш муассасалари, ёнғин хавфи бўлган жойлар, жумладан, автомобилга ёқилғи қуйиш шохобчалари ва бошқа жамоатчилик жойларида тамаки маҳсулотларини истеъмол қилиш энг кам ойлик иш ҳақининг учдан бир қисми ҳажмидаги жарима билан жазоланади.
