ТОШКЕНТ, 15 сен — Sputnik. Ўзбекистон ташқи ишлар вазири Абдулазиз Камилов Бишкекда Тожикистон ташқи ишлар вазири Сирожиддин Аслов ва Қирғизистон ташқи ишлар вазири Эрлан Абдилдаев билан учрашганлиги хабар қилинади Ўзбекистон Республикаси ташқи ишлар вазирлиги сайтида.
"2016 йилнинг 15 сентябрь куни Ўзбекистон Республикаси Ташқи ишлар вазири Абдулазиз Камилов Мустақил Давлатлар Ҳамдўстлиги Ташқи ишлар вазирлари кенгаши мажлиси ишида иштирок этиш доирасида Бишкек шаҳрида Тожикистон Республикаси ташқи ишлар вазири Сирожиддин Аслов ҳамда Қирғизистон Республикаси ташқи ишлар вазири Эрлан Абдилдаев билан учрашувлар ўтказди”, дейилади хабарда.
Бўлиб ўтган суҳбатларда вазирлар икки томонлама муносабатларнинг, МДҲ ва бошқа халқаро ташкилотлар доирасидаги ҳамкорликнинг амалий масалалари муҳокама қилингани ҳамда минтақавий ва халқаро муаммолар юзасидан фикр алмашилганлиги айтилади хабарда.
Илгарироқ Камилов Қирғизистон президенти Алмазбек Атамбаев билан учрашганлиги ва Ўзбекистон томони мавжуд бўлган барча масалалар борасида “ўзаро ҳурмат ва қўшничилик анъаналарига асосан ижобий кайфият билан” ишлашга тайёр эканлиги хабар қилинганди.
