ТОШКЕНТ, 5 окт — Sputnik. Тошкент шаҳрида сомса сотадиган аёл ўз маҳсулотини ўтказишнинг антиқа йўлини ўйлаб топди.
"Сомсани зўри, қалбимни қўри, емаганларни шўри. Сомсаларни зўр қилиб ёпган адажонисининг қўли", — деб ўз маҳсулотини реклама қилмоқда сомсапаз.
"Айтинг, айтинг яна" дея қистаганларидан сўнг аёл шундай дея давом этади:
"Сомсалар думбали, сомсалар шўрвали. Сомсани ёпган ўғлимни отини айтайми? Абдували!", — дейди ва бу гаплардан кайфияти кўтарилиб хандон отиб кулаётган мижози қўлига иссиққина сомсани тутқазади ва "Пулни беринг!" деганча "Қўлимда пул, менга қараб кул", — дея хайрлашади.
"Сомса бу ёқда, кўзиз қаёқда" деганча ўз маҳсулотига харидор чорлашда давом этаётган аёлнинг антиқа маркетингги кўпчиликни ҳайратга солмоқда.
"Маркетинг деганлари мана шундай бўлиши керак! Қорним оч бўлмаса-да, беихтиёр учта сомса олдим. Аёлни видеога олмоқчи эдим, у унамади", — деб ёзади Facebook ижтимоий тармоғининг TrollUZB гуруҳи фойдаланувчиси. Қуйида сомсапаз аёлнинг "маркетологлик" маҳоратини тинглаб, баҳо беришингиз мумкин.
