ТОШКЕНТ, 14 окт — Sputnik. 2016-йил 13-октябрда Вазирлар Маҳкамасининг жорий йил 9 ойида республикани ижтимоий-иқтисодий ривожлантириш якунларини, 2016-йилги иқтисодий дастурнинг энг муҳим йўналишлари ва устувор вазифаларини амалга ошириш натижадорлигини муҳокама қилишга бағишланган мажлиси бўлиб ўтди, деб хабар қилади Ўзбекистон ТИВ матбуот-хизмати.
Давлат бюджети ялпи ички маҳсулотга нисбатан 0,1 % миқдорида профицит билан ижро этилган. Инфляция даражаси прогноз параметрларидан ошмаган.
Ўтган 9 ойда ўртача ойлик иш ҳақи 12,6 %га ошган, жорий йил 1 октябрдан эса бюджет соҳаси ходимларининг иш ҳақи, пенсиялар, нафақалар ва стипендиялар яна 15 %га оширилган. Янги қишлоқ массивларида замонавий намунавий лойиҳалар бўйича 12 мингтадан ортиқ шинам ва қулай шахсий уй-жой фойдаланишга топширилган.
"Қишлоқ хўжалиги соҳасини ривожлантириш, модернизациялаш ва диверсификациялаш бўйича дастурий чора-тадбирлар фаол амалга оширилмоқда. Замин заҳматкашларининг фидокорона меҳнати ва миришкорлиги туфайли, мураккаб об-ҳаво шароитларига қарамай, қишлоқ хўжалиги маҳсулотларининг бой ҳосили етиштирилди ва йиғиштириб олинди. Натижада қишлоқ хўжалиги маҳсулотлари ҳажми 6,4 %га ўсиши таъминланди", — дейилади хабарда.
Ўзлаштирилган инвестициялар ҳажми — 9,4 %га, шу жумладан, хорижий инвестициялар — 11,2 %га ўсган.
Йил бошидан буён 2016 йилги Инвестиция дастури доирасида 100 та йирик ишлаб чиқариш объекти ишга туширилди. Йил охиригача 64 та йирик ишлаб чиқариш қувватини фойдаланишга топшириш мўлжалланган.
