Ўзбекистонда Diktant.uz акцияси ўтказилади

ТОШКЕНТ, 21 окт — Sputnik. 29 октябрь куни Тошкентда диктант ёзиш бўйича акция ўтказилади.

Ушбу ёзма саводхонлик бўйича акция UZINFOCOM Маркази ва Алишер Навоий номидаги Тошкент давлат ўзбек тили ва адабиёти университети томонидан Олий ва ўрта махсус таълим вазирлиги ҳамда мамлакатимиздаги бир қатор университет, институт, ташкилотлар ҳамкорлигида 1989 йил 21 октябрда ўзбек тилига давлат тили мақоми берилганлигига 27 йил тўлиши муносабати билан, ўзбек тилининг ижтимоий мавқеини янада мустаҳкамлаш, аждодлардан авлодларга ўтиб келаётган бебаҳо бойлик — ўзбек тилининг ворислари сифатида она тилини асраб — авайлаш, унинг нуфузини янада ошириш мақсадида ўтказилмоқда.

Diktant.uz акцияси — аҳоли, айниқса ёшлар орасида ёзма саводхонлик маданиятини кенг тарғиб қилиш, ўзбек тилига бўлган ҳурмат ва қизиқишни янада ошириш ҳамда ўзбек тили таълимини такомиллаштиришга қаратилган таълимий акция ҳисобланади.

Мазкур акцияда иштирок этиш ёши чегараланмаган бўлиб, унда ўзбек тилида ёзишни биладиган барча хоҳловчилар диктант ёзиш йўли орқали имло саводхонлиги бўйича ўз билимларини текшириб кўриш имкониятига эга бўладилар.

Акция 2016 йилнинг 29 октябр куни соат 15-00 да бир пайтнинг ўзида қуйидаги манзиллар бўйича ўтказилади:

— Алоқа тарихи музейи (Шайхонтоҳур тумани, Навои кўчаси, 28 а);

— Тошкент Давлат шарқшунослик институти (Миробод тумани, Шахрисабз кўчаси, 25 уй);

— Тошкент Давлат ўзбек тили ва адабиёти университети (Ўзбекистон миллий Университети биносида, Олмазор тумани, Талабалар шаҳарчаси, Университет-4 кўчаси);

— Ўзбекистон Давлат жаҳон тиллари университети (Учтепа тумани, Кичик ҳалқа йўли кўчаси Г-9а мавзеси, 21 а).

Акцияда иштирок этиш истагида бўлган хоҳловчилар www.diktant.uz сайтида олдиндан рўйхатдан ўтишлари мақсадга мувофиқ.

Diktant.uz  акциясига ўзбек тили бўйича ёзма саводхонликларини синамоқчи бўлган барча хоҳловчиларни иштирок этишга таклиф қиламиз!