ТОШКЕНТ, 26 окт – Sputnik. Ўзбекистон Республикаси Президенти вазифасини бажарувчи Шавкат Мирзиёев Кветта шаҳридаги полиция академиясида содир этилган террорчилик ҳужуми натижасида кўплаб инсонларнинг ҳалок бўлгани муносабати билан Покистон Ислом Республикаси Бош вазири Навоз Шарифга мактуб йўллади.
Бу ҳақда Ўзбекистон Республикаси ҳукумат порталида маълум қилинди.
Шавкат Мирзиёев Покистон Ҳукумати ва халқига чуқур таъзия билдирди ҳамда ҳалок бўлганларнинг оила аъзоларига ва жароҳат олганларга самимий ҳамдардлик изҳор этди.
Эслатиб ўтамиз, академияга 25 октябр куни эрталаб уюштирилган ҳужум натижасида 60 нафардан зиёд киши қурбон бўлди, 165 киши жароҳатланди. Ҳужум учун жавобгарликни ИШИД ўз зиммасига олди.
