ТОШКЕНТ, 12 ноя — Sputnik. Президентликка номзод ўз сайловчилари олдида чиқиш қилар экан, уларнинг эътиборини муҳим бир масалага қаратди. Сарвар Отамуродовга кўра, камдан-кам бўлса-да, аммо ҳали ҳам вояга етмаганлар ўртасида никоҳдан ўтиш ҳолатлари кузатилмоқда.
"Шу боис, эрта турмуш ва яқин қариндошлар ўртасидаги никоҳнинг олдини олиш борасида аниқ ва таъсирчан чоралар кўриш, бу борадаги тарғибот-тушунтириш ишлари, жамоатчилик назоратини кучайтириш, оила ва оилавий қадриятларни мустаҳкамлаш, ёш оилаларга ғамхўрликни ошириш бўйича ишларни изчил давом эттириш масалаларига алоҳида эътибор қаратиш лозим", — деб қайд этди Отамуродов.
"Ўзлигини англаган, қадрият ва анъаналарини эъзозлаган, тарихий хотирасини асраган халқ иқтисодий, ижтимоий ва гуманитар тараққиётга юз тутади. Мамлакатимизда бу борада эришилган ютуқларни мустаҳкамлаш ва амалга оширилаётган ислоҳотларни янада чуқурлаштириш энг муҳим вазифа. Партиямиз миллий ўзликни англаш, миллий ғурур ва қадр-қиммат туйғусини мустаҳкамлаш масалаларига устувор аҳамият берган ва бундан буён ҳам ушбу ҳаётий масалалар доимо эътиборда бўлади", деб қайд этди Сарвар Отамуродов.
Президентликка номзод сайловчиларни 2016-йил 4-декабр куни бўлиб ўтадиган Ўзбекистон Республикаси Президенти сайловида фаол иштирок этишга чақирди, дейилади хабарда.
