Кун янгилиги: Талабаларга бир хил миқдорда стипендия тайинланади

© Sputnik / Рамиль Ситдиков / Медиабанкка ўтишТалабалар
Талабалар - Sputnik Ўзбекистон
Oбуна бўлиш
Олий таълим муассасаларининг барча талабаларига семестрни қандай баҳода якунлашидан қатъи назар бир хил миқдорда стипендия тайинланиши мумкин

ТОШКЕНТ, 31 янв — Sputnik. Ҳуқуқшунос Хушнудбек Ҳудойбердиев facebookдаги "Маслаҳат" гуруҳида бу ҳақда маълум қилган.

"Хабарларга кўра, келгусида олий таълим муассасаларининг барча талабаларига семестрни қандай баҳога якунлашидан қатъи назар, бир хил миқдорда стипендия тайинланиши тўғрисида ўзгариш киритилиши мумкин.

Бу қарор баҳо ортидан қувиш, яхши баҳо олиш учун моддий манфаат ва таъмагирликларнинг олдини олишга озми-кўпми хизмат қилиши шубҳасиз", деб ёзган Хушнудбек ўз саҳифасида.

Мазкур қабул қилиниши мумкин бўлган қарор юзасидан интернет фойдаланувчиларининг фикри иккига бўлинмоқда.

Талаба стпендияси нималарга етади - Sputnik Ўзбекистон
Талаба стипендияси нималарга етади?
"Жуда яхши фикр", дея хабарга ўз муносабатини билдирган Асилбек никли фойдаланувчи.

"Аҳмоқона қарор", дея унга эътироз билдирган Шурзод Муталов.

Ижтимоий тармоқ фойдаланувчиси Ўктам Ўринтаевнинг фикрича эса, "агар барча талабаларга бир хил миқдорда стипендия тайинланса, ўқишга бўлган интилиши тушиб кетади. Ҳаммага бемалол бўлиб қолади".

"Ўқидинг нимаю, ўқимадинг нима, бир хил стипендия олсанг, тўғри қарор эмас", — дея Уринтаев билдирган фикрни маъқуллаган Азамат Қаршиев.

"Контрактни ҳам бекор қилишса яхши бўларди", — дея таклиф киритган Камол никли фойдаланувчи.

Диплом чўнтакда, келажак қўлда, хаёлда нима?! - Ўзбек талабалари ҳаётидан репортаж
"Контрактни эмас бюджетни бекор қилиш керак. Контракт миқдорини ошириб, кириш имтиҳонларини йўқ қилиш керак. Сессия якунида кам балл тўплаган талабаларни ўқишдан четлатиш, қайта топширишни эса бир йилга суриб, пулли қилиш лозим. Жаҳон тажрибасида шундай ва бу ўзини оқлаган. Бизнинг Олийгоҳларимиз кадрлаш тайёрлаш масаласида жаҳон бўйича анча қуйида туради", деган Камолга жавобан Нажмиддинбек Эрматов.

"Ўқийдиганларга қийин бўлади ўқимайдиганлар юраверади 2-видемостни бўйлаб барибир шу стипендия деб", — деб ёзган Саидали Ахтамов.

Сардор Қодиралиевич исмли фойдаланувчи эса стипендиялар йўқ қилинса яхши бўларди, деган фикрни илгари сурган.

"Таълим тизимини ислоҳ қилиш бу жуда нозик масала. Бу қарорни кўриб чиқаётганлар ҳам, албатта, ҳар томонлама фикр юритишларига ишонаман. Чет эл тажрибасидан келиб чиқадиган бўлсак, умуман стипендияни йўқ қилишса яхши бўларди", — деб ёзган Сардор.

Хуллас, ҳамма ҳар хил фикр билдиришда давом этмоқда. Мақола муаллифи янгилик расман қабул қилиниши билан бу ҳақда хабар қилишини айтган. Спутник Ўзбекистон ҳам албатта бу янгилик тақдирини кузатиб боради.

Янгиликлар лентаси
0