Олимлар: одамлар ўз келажагини билишни истамайди

ТОШКЕНТ, 23 фев — Sputnik. Фақат 1 фоиз одамларгина ҳар қандай шароитда ҳам ўз келажагидан бохабар бўлишни исташади, уларнинг 10%и эса рўй бериши мумкин бўлган ёмон ҳодисаларни олдиндан билиш қобилиятига эга бўлишни хоҳлайдилар, Psychological Review нашрида эълон қилинган мақолада руҳшунослар худди шундай таъкидлашган. РИА Новости хабари асосида.

"Приам қизи Кассандра келажакни кўра олиш қобилиятига эга, аммо шу билан бирга у лаънатланган бўлгани учун унинг башоратларига ҳеч ким ишонмасди. Биз шуни аниқладик-ки, одамлар Кассандрани машҳур қилиб юборган иқтидорга эга бўлишдан кўра, ундан воз кечишга кўпроқ мойил. Одамлар келажакни олдиндан билиш хусусияти туфайли жафо чекишни ва пушаймон бўлишни исташмайди. Улар яхши воқеаларни кутиб, улардан роҳатланиб яшашни хоҳлайдилар", — деб ҳикоя қилган Берлиндаги Инсон тараққиёти институти ходими Герд Гигеренцер.

Маълум бўлишича, Гигеренцер ўз ҳамкасблари билан Германия ва Испания аҳолиси келажакни олдиндан билиш сингари "супериқтидор"га қандай муносабатда эканини аниқлашга уринганлар.

Олимлар иккала давлатда икки мингга яқин одамларга шу савол билан мурожаат қилиб, кутилмаган хулосага келадилар — респондентларнинг 1% оқибати қандай бўлишидан қатъи назар ўз келажагидан бохабар бўлишни, 10%и кўнгилсиз ҳодисаларни олдиндан билиш хусусиятига эга бўлишни ва 30%и эса хурсандчилик олиб келадиган воқеаларни олдиндан билишни исташларини маълум қилишган.