ТОШКЕНТ, 2 мар — Sputnik. Пойтахтдаги меҳмонхоналардан бирида маъмур бўлиб ишлайдиган Анвар (исмлар ўзгартирилган) меҳмонхонага ташриф буюрадиган эркаклардан 90 минг сўмдан 120 минг сўмгача пул ундириб, уларга шаҳвоний ҳирсларини қондиришлари учун зарур шароитни яратиб беришни ўзига касб қилиб олди, деб хабар қилмоқда Ички ишлар вазирлиги матбуот-хизмати.
Кунларнинг бирида Анвар кўнгилочар масканлардан бирининг раҳбари Одилжон деган киши билан танишиб қолади. Одилжон унга ўзи раҳбарлик қилаётган маскан кечки соат 18.00дан тунги 03.00га қадар ишлашини, у ерга асосан хорижликлар ташриф буюришини, уларнинг меҳмонхонада енгилтабиатли аёллар билан кўнгилхушлик қилиши учун шароит яратиб берса, чет эл валютасида пул тўлашини билдирди.
Кўп ўтмай Одилжоннинг ҳаракати билан кўнгилочар маскан мижозларини меҳмонхонага олиб бориш йўлга қўйилиб, ҳайдовчилар тайинланди. Шу тариқа уюшган жиноий гуруҳга асос солинди. Анвар ҳар бир меҳмонга ажратилган хона учун 50 доллардан, таксичилар эса 10 доллардан "хизмат ҳақи" оладиган бўлди.
Тегишли идораларга қилинган шикоятдан кейин махсус тадбирда Анвар навбатчилик қилаётган бир кечанинг ўзида 32 нафар эркак ва аёлга ноқонуний равишда хоналар ажратгани маълум бўлди. Унинг сейфидан тегишли тартибда меҳмонхона ғазнасига кирим қилинмаган 3 миллион 523 минг сўм ва 500 доллар ашёвий далил сифатида олинди.
ИИВ матбуот хизматидан маълум қилишларича, уюшган жиноий гуруҳнинг барча аъзоларига жазо тайинланди.
