ТОШКЕНТ, 20 мар — Sputnik. Ўзбекистон Россиянинг МДҲдаги асосий савдо-иқтисодий ҳамкори бўлиб қолади, деб таъкидлади Россия ташқи ишлар вазири Сергей Лавров икки мамлакат ўртасида дипломатик алоқалар ўрнатилганлигига 25 йил тўлиши муносабати билан йўллаган мактубида.
"Ўтган 25 йил давомида Россия ва Ўзбекистон тенг ҳуқуқлилик, ўзаро ҳурмат, мустаҳкам дўстлик анъаналари тамойилларига асосланган муносабатларни ривожлантиришда сезиларли натижаларга эришдилар ҳамда бу муносабатларни янада юқори даражага олиб чиқдилар", — деди Россия ТИВ раҳбари.
Унинг сўзларига кўра, томонларнинг юқори даражадаги мунтазам алоқалари икки мамлакат ҳамкорлигининг ривожланишида муҳим омил бўлмоқда. Лавров шунингдек, иқтисодий алоқаларнинг ривожланишида Ўзбекистон ва РФ ўртасидаги иқтисодий ҳамкорлик бўйича Ҳукуматлараро комиссиянинг алоҳида ўрни борлигини қайд этди.
"Нишонланаётган мазкур сана Россия Федерацияси ва Ўзбекистон Республикаси ўртасидаги ҳар омонлама алоқаларни мустаҳкамлаш, биродар халқлар фаровонлиги, Марказий Осиё минтақасида тинчлик, хавфсизлик ва барқарорликни мустаҳкамлашга хизмат қилади", —деди Россия ТИВ раҳбари.
Ўзбекистон ташқи ишлар вазири Абдулазиз Камилов ўз навбатида ўтган чорак аср давомида икки мамлакат икки томонлама муносабатларнинг барча соҳаларида ҳамда халқаро ва минтақавий ташкилотлар йўналишида ўзаро манфаатли ҳамкорликни йўлга қўйганини эътироф этди.
"Ўзбекистон ва Россия ўртасидаги савдо-иқтисодий, ҳарбий-сиёсий ва гуманитар соҳалардаги алоқаларнинг ривожланиши ҳамда стратегик ҳамкорликнинг кучайиши Марказий Осиё минтақасидаги барқарорлик ва хавфсизликни сақлашга хизмат қилиши ҳақидаги фикрингизга қўшиламан", — дея қайд этди Камилов.
Ўзбекистон ва Россия ўртасидаги дипломатик муносабатлар 1992 йил 20 мартда ўрнатилган.
