ТОШКЕНТ, 20 мар — Sputnik. Ўзбекистоннинг Биринчи Президенти Ислом Каримовнинг қизи, Ўзбекистоннинг ЮНЕСКОдаги доимий вакили Лола Каримова-Тилляева ижтимоий тармоқдаги шахсий саҳифаси орқали Наврўз байрами билан табриклади.
"Буюк ипак йўли бўйида истиқомат қилувчи миллионлаб одамлар, турли миллат ва элат вакиллари ҳар йили баҳорда 3 минг йиллик тарихга эга Наврўз байрамини нишонлайдилар. Ушбу байрам ЮНЕСКО томонидан инсониятнинг номоддий маданий мероси рўйхатига киритилган.
Наврўзи олам — шарқона янги йилнинг бошланиши ва табиат уйғонишининг рамзи бўлиб, турли миллатлар, маданиятлар ва динларга мансуб инсонлар орасида меҳр-оқибат, ҳамжиҳатлик, инсонийлик ва бағрикенглик муҳитини янада мустаҳкамлашга хизмат қилади.
Саҳифамнинг азиз муштарийлари, мен сизларни янгиланиш ва яшариш байрами билан чин қалбимдан муборакбод этаман. Баҳор гўзаллигидан баҳра олиб, қалбларингиз меҳр-мухаббатга ва нурга тўлсин! Наврўз муборак!", деб ёзади у.
