ОАВ: Россияда болаларга ижтимоий тармоқлардан фойдаланишни таъқиқлашмоқчи

ТОШКЕНТ, 5 апр — Sputnik. Ленинград вилояти Қонунчилик кенгаши "Ижтимоий тармоқлар фаолиятини ҳуқуқий тартибга солиш тўғрисида"ги қонун лойиҳасини ишлаб чиқди, деб хабар қилди РИА Новости.

Хабарга кўра, эндиликда ижтимоий тармоққа аъзо бўлмоқчи бўлган фойдаланувчилар ўз паспорт маълумотларини тақдим этишлари керак бўлади. Шу билан бирга, 14 ёшгача бўлган болаларга ижтимоий тармоқларга аъзо бўлиш буткул таъқиқлашмоқчи.

Ҳужжатга мувофиқ, агар сервис эгаси Россия ёхуд чет эл фуқароси паспортига оид маълумотларни текширмайдиган бўлса, уни 100 минг рублдан 300 минг рублгача (тахминан 1700 доллардан 5300 долларгача, таҳр.) жаримага тортишлари мумкин.

Агар фойдаланувчи маълумотлар ўзгаргани ҳақида хабар қилмаса ёхуд қасддан нотўғри маълумотларни тақдим этса, 1 рублдан 3 минг рублгача жаримага тортилади.

Шунингдек, қонун кучга кирадиган бўлса, ижтимоий тармоқларда фақатгина ҳақиқий исм-фамилия остида аккаунт яратиш мумкин бўлади, акс ҳолда, жарима белгиланиши мумкин: сайт эгаси — 300 минг рублгача, фойдаланувчи — 5 минг рублгача жарима тўлайди.

Бундан ташқари, 18 ёшга тўлмаганларга болалар учун таъқиқланган маълумотлар бериладиган гуруҳларга аъзо бўлиш таъқиқланади. Акс ҳолда, ота-оналарга 2 минг рублгача жарима белгиланиши мумкин.

Шунингдек, қонун балоғат ёшига етмаган болаларга ижтимоий тармоқлар орқали товарлар сотилишини тартибга солиши айтилмоқда.

Қонунчилик лойиҳаси ташаббускорларидан бири — Ленинград вилояти Қонунчилик кенгаши депутати Владимир Петровнинг изоҳ беришича, қонун 2018 йилнинг 1 январидан кучга кириши кутилмоқда. Қонун шунингдек, давлат ташкилотлари ишчиларига иш вақтида ижтимоий тармоқлардан фойдаланишни тўлиқ таъқиқлашни назарда тутади.

Ушбу қонунчилик лойиҳаси, бугун, яъни 5 апрел куни Россия Давлат думасига киритилиши айтилган.