ТОШКЕНТ, 30 июн — Sputnik. Ўзбекистон президентининг "2017-2019 йилларда Бухоро шаҳри ва Бухоро вилояти сайёҳлик салоҳиятини жадал ривожлантириш чора-тадбирлари тўғрисида"ги қарори ижросини таъминлаш ҳамда кенг қамровли реклама кампаниясини ўтказиш ва Бухоро брендини тарғиб қилиш мақсадида "Welcome to Bukhara" номли туризм реклама ролигини тасвирга олиш бошланди, деб хабар қилди Ўзбекистон Республикаси Туризмни ривожлантириш давлат қўмитаси матбуот-хизмати.
Тасвирга олиш ишларида маданий ва тарихий объектлар, шунингдек миллий ҳунармандчилик, урф-одатлар, миллий ошхонани тўлақонли ва ижобий талқинда тасвирлаш учун карвон буюмлари, жумладан мис идишлар, қадимий сандиқ ва катта ҳажмдаги кўзалар, сўзана ва гиламлар, бешик, туялар, отлар, кабутарлар, тандир, ноз-неъматлардан (нон, қовун-тарвуз, қуритилган мевалар, ҳўл мевалар) фойдаланилмоқда.
Ҳозирда "Welcome to Bukhara" номли имиджли реклама ролигининг ташкилий ишлари якунланди ва 18 июндан тасвирга олиш ишлари бошлаб юборилди.
Эслатиб ўтамиз, илгарироқ расмий Тошкент ва Бишкек ўртасида ўтказилган туризм соҳасини чуқурлаштиришга қаратилган учрашувда Қирғизистон томон Ўзбекистоннинг сайёҳлик салоҳияти ҳақидаги видеороликларни Қирғизистонда трансляция қилишга тайёрлигини билдирган эди.
Бизнинг Telegramдаги ўзбекча каналимизга обуна бўлинг ва энг янги хабарларни биринчи бўлиб ўқинг.
