ТОШКЕНТ, 31 июл — Sputnik. Россиялик модельер ва журналист Екатерина Рождественская Ўзбекистонга саёҳат уюштирмоқчи, деб хабар қилинди Михаил Кожуховнинг саёҳатлар клуби блогида.
"Яна ҳунармандлар билан учрашув сари ошиқяпман, эндиги сафарим Ўзбекистонга! Сайёҳлар кўп борадиган жойлар, яъни барчага таниш бўлган сайёҳлик маршрутларидан, машҳур ҳудуд ва катта қишлоқлардан узоқроқ бўлишга ҳаракат қиламан. Бу гал сафарим қишлоқлар, ҳунармандчилик устахоналари, ипак йўллари, тунги бозорларга бўлади. Қадимий сўзаналар билан танишишни ҳам режалаштирганман".
Рождественскаянинг сўзларига қараганда, у билан бирга Ўзбекистонга саёҳатга отланаётган гуруҳ риштонлик устадан кулолчилик сирларини ўрганадилар, шунингдек фарғоналик ошпаз аёллардан палов ва сомса тайёрлаш бўйича дарс оладилар.
Эслатиб ўтамиз, жорий йилнинг апрел ойида "Модный приговор" бошловчиси Александр Васильев ҳам Ўзбекистонга саёҳатни амалга ошириб, юртдан ажабтовур таассуротлар билан қайтган эди. Васильев Россияга қайтгач ўз кўрсатувида томошабинларга Ўзбекистондаги миллий матолар жозибадорлиги ва бетакрорлигини қайд этиб, бундан ташқари мамлакат нақадар озода ҳамда мазали таомларга бойлигини гапириб берганди.
