Ўзбекистон мевалари Россиянинг энг қиммат ресторанлари менюсидан ўрин олади

ТОШКЕНТ, 15 авг — Sputnik. "Ўзтрейд" компанияси ва Россиянинг "Ла Маре" ритейлери Москвада "УзТрейд ЛМ" савдо уйини очиш бўйича меморандум имзолади, деб хабар қилди Спутник Ўзбекистон мухбири республика ташқи савдо вазирлиги матбуот-хизматига таянган ҳолда.

Ҳужжат икки компания делегацияларининг шу кунларда Тошкентда бўлиб ўтган учрашуви давомида имзоланган. Бугунги кунда "Узтрейд" Россиядаги ресторан ва отелларга ўзбек сабзавотлари ва меваларини етказиб бериш билан шуғулланиб келмоқда.

Хабарга кўра, "Узтрейд" Россияга фермерчилик ва деҳқончилик маҳсулотлари экпорт қилинишини таъминлайди.

Маҳкама матбуот-хизматидаги манбанинг сўзларига кўра, Россия пойтахтида савдо уйининг очилиши сентябр ойи охири октябр ойи бошларига режалаштирилган. Дастлабки баҳолашларга кўра, йил охиригача Россияга 10 минг тонна барра, қуритилган ва қайта ишланган мева-сабзавотлар экспорт қилиниши кутилмоқда.

Таъкидлаш жоизки, "Ла Маре" — ресторанларга хизмат кўрсатувчи машҳур брендлардан биридир. У Х5 Retail Group, "Ашан", "Метро", O'KEY, "Азбука вкуса", "Магнит", "Глобус Гурме", "Алые Паруса", "Глобус", "Магнолия", "Гиперглобус" сингари йирик тармоқ мижозлар билан ҳамкорлик юритади. Шунингдек, компания олий турдаги дўконлар, гастрономик ва вино бутиклари, гипермаркетлар, супермаркетлар, дискаунтерлар ва минимаркетларга хизмат кўрсатади.

Компания Москвада тўртта, Санкт-Петербург ва Монакода биттадан La Maree номли ресторанларга эга. Шунингдек, Санкт-Петербург, Жанубий Сахалин,Владивосток, Екатеринбург, Сочи, Мурманск ва қатор хорижий давлатларда ўз офислари ва бўлинмаларига эга.