Самарқанд "зарбдор бир ойлик" эълон қилди

© Sputnik / Алексей Куденко / Медиабанкка ўтишСборщики хлопка на поле
Сборщики хлопка на поле - Sputnik Ўзбекистон
Oбуна бўлиш
Самарқанд вилояти "зарбдор бир ойлик" эълон қилди. "Касби, ёши, турар жойидан қатъи назар, вилоятда яшовчи ҳар бир меҳнатга лаёқатли фуқаро зарбдор ойлик давомида ўзини пахтакор деб билиб, этак боғлаб, далага чиқсин, оила аъзолари, таниш-билишларини ўзи билан бирга эргаштирсин" - дейилади "Зарафшон" газетасида эълон қилинган мурожаатда

ТОШКЕНТ, 19 окт — Sputnik. Самарқанд вилояти шарномавий режанинг 85%дан ортиғини бажарган бўлишигиа қарамай, мутахассислар ҳисоб-китобига кўра, вилоят далаларида яна 60 минг тоннадан зиёд пахта ҳосили мавжуд, деб хабар қилди "Зарафшон" нашри.

Нашр шу боисдан самарқандликларни "зарбдор бир ойлик"да иштирок этишга чорламоқда.

Сбор хлопка - Sputnik Ўзбекистон
"Дим зўр": Ўзбекистонда пахта режасини биринчи бўлиб Хоразм вилояти бажарди
"Қадрли юртдошлар!

Мамлакатимизда пахта хирмонининг тақдири ҳал бўладиган палла келди. Ҳосил деҳқонлар, қишлоқ аҳли, туман марказлари ва шаҳарлардаги уюшмаган аҳоли ёрдамида териб олинмоқда. Хизмат ҳақининг ҳар куни нақд пулда берилиши, яшаш шароити яратилгани боис кўплаб юртдошларимиз онгли равишда этак боғлаб, далага чиқмоқдалар.

Бироқ ҳосилнинг мўл-кўллиги, қолаверса, об-ҳавонинг тез-тез ўзгариб туриши катта меҳнат эвазига етиштирилган хомашёни тезроқ йиғиштириб олишни тақозо этмоқда. Бундай пайтда меҳнатга яроқли ҳар бир фуқаронинг пахта теримига чиқиши хирмон тақдирини ҳал қилади. Айнан шунинг учун ҳам биз вилоят аҳлига мурожаат қилишни лозим топдик.

Бизда пахта тақдирини фақат деҳқон зиммасига юклаб қўйиш муносабати йўқ эмас. Тўғри, уни деҳқон экади, етиштиради ва сотади. Лекин ушбу ҳосил неъматларидан барчамиз фойдаланамиз. Устимиздаги либосдан тортиб, таомга солинадиган ёғ, чорва молларига бериладиган витаминга бой озуқа ҳам шу хомашёдан олинади. Пахтани қайта ишловчи корхоналарда ўзимизнинг фарзандларимиз ишлайди. Пахта миллий бойлигимиз, деганда ана шу омиллар назарда тутилишини эсдан чиқармайлик.

Города Мира. Ташкент - Sputnik Ўзбекистон
Ватан ва ватанпарварлар ҳақида
Ҳар қандай ҳолатда ҳам пахта энг мақбул саноат хомашёси ҳисобланади. Пахта ва ундан қайта ишланган маҳсулотларни сотишдан тушадиган маблағ мамлакат қишлоқ хўжалигидан келадиган ялпи валюта фондининг катта қисмини ташкил этади. Шу сабабли давлатимиз раҳбарининг ташаббуси ва бевосита ҳаракати билан бу борада кескин ўзгаришлар қилинмоқда. Иқтисодий муносабатларда тартиб ўрнатиш, фермер масъулиятини ошириш, пахтанинг янги, илғор навларини яратиш, машина терими салмоғини кўпайтириш, хизматга ҳақ тўлаш тизимини такомиллаштириш каби чоралар кўрилмоқда.

Вилоятимизда жорий йилда 85 минг 500 гектар майдонда пахта ҳосили етиштирилди. Шартномавий режанинг 85 фоиздан кўпроғи бажарилди. Аммо мутахассисларнинг ҳисоб-китобига кўра, вилоятимиз далаларида яна 60 минг тоннадан зиёд пахта ҳосили мавжуд. Унинг учдан бир қисми, яъни 20 минг тоннаси сифатли тола дегани. Бир тонна ўзбек пахта толасининг бугунги жаҳон бозоридаги ўртача нархи 1 минг 800 долларни ташкил этмоқда. Демак, далаларимизда ҳали қарийб 36 миллион долларга тенг пахта хомашёси мавжуд. Бундан ташқари, шу миқдордаги толани қайта ишлаш орқали хазинамизга 28 миллиард сўмлик ип-калава ва 421 миллиард сўмлик газламадан маблағ келиб тушиши мумкин. Шу миқдордаги ҳосилдан 5,4 минг тонна ёғ, 28,8 минг тонна чорва моллари учун озуқа-ем олинади. Бу давлатимиз бюджетига қўшимча даромад олиб келади. Натижада янги мактаблар, болалар боғчалари, йўллар қурилади.

Энди ҳар биримиз ўйлаб кўрайлик. Шунча бойликни ўз ҳолига ташлаб қўйиш халқ ризқини увол қилиш эмасми? Шундай масъулиятли паллада барча юкни деҳқон зиммасига ташлаб қўйиш инсофданми?

Муқаддас динимизда исроф қаттиқ қораланган. Ким шунга амал қилса, неъматларни қадрласа, нест-нобуд бўлишига йўл қўймаса, Аллоҳнинг неъматларини тан олган ва У зотга шукр қилган бўлади. Ўз навбатида, Аллоҳ таоло бундай бандага неъматларини бардавом қилади.

Яна бир гап. Шунча ҳосилни етиштириш учун меҳнатдан ташқари катта маблағ сарфланган. Бу йилги пахта хомашёсини етиштириш учун 345 миллиард сўмлик харажат қилиниб, шундан минерал ўғитларга 57 миллиард сўм, ёқилғи-мойлаш материалларига 55 миллиард сўм, иш ҳақига 152 миллиард сўм ҳамда агротехник тадбирлар учун 34 миллиард сўм сарфланган.

Бу харажатлар қопланиши, ўз жойига қўйилиши ва ниҳоят, қўшимча даромад олиниши лозим. Акс ҳолда тизимдаги молиявий муаммолар кўплаб соҳаларга, ҳатто аҳолининг яшаш даражасига ҳам таъсир кўрсатади.

Уборка хлопчатника - Sputnik Ўзбекистон
Пахта экспорти бўйича давлат монополияси тарқатиб юборилади
Республика жамоатчилигининг, хусусан, ижодкор зиёлиларнинг пахта йиғим-теримида "Зарбдор 30 кунлик" эълон қилиши, уюшмаган аҳолини бу савобли ишга даъват этиш ташаббусига биз ҳам чин дилдан қўшиламиз.

Самарқанд зиёлилари, нодавлат нотижорат ташкилотлари ходимлари, ижодкорлар, санъаткорлар бугундан эътиборан қишлоқ аҳлига ёрдамга чиқиш бўйича ташаббус билан чиқмоқдамиз.

Муҳтарам Юртбошимиз Шавкат Миромонович Мирзиёевнинг вилоятимизга кўрсатаётган эътиборини кўриб турибмиз. У кишининг ташаббуси билан киритилаётган инвестиция лойиҳалари ҳаётимизнинг фаровон бўлишига хизмат қилмоқда. Бунга жавобан бизнинг бу ислоҳотларда фаол иштирок этишимиз ҳам фарз, ҳам қарз деб ҳисоблаймиз.

Касби, ёши, турар жойидан қатъи назар, вилоятда яшовчи ҳар бир меҳнатга лаёқатли фуқаро зарбдор ойлик давомида ўзини пахтакор деб билиб, этак боғлаб, далага чиқсин, оила аъзолари, таниш-билишларини ўзи билан бирга эргаштирсин.

Мисол учун, агар оиладан уч киши бир кунда 10 килограмдан пахта териб берса, бу ҳам деҳқонга мадад. Сизга ўхшаган оиладан 50 та, 100 та чиқса-чи? Ёки 10 килограмм эмас, 30-70 килограмдан пахта терсак-чи? Кўряпсизми, иштиёқ ва ҳафсала ҳосилни қисқа муддатда йиғиштириб олишга кўмаклашади. Қолаверса, халқимиз ҳашар деган улуғ удум орқали юрт учун зарур бўлган улуғвор ишларни ҳам уддалашган. "Ҳашар — элга ярашар" деб бежиз айтишмаган.

Ҳозирги шароитда ҳузур-ҳаловатдан воз кечиб, айрим тадбирларни тўхтатиб туриш миллатимизга хос юксак фазилат эканини унутмайлик. Шу боис, эртадан оммавий ҳашар уюштирайлик. Негаки, шу йўл билангина кўзлаган ниятимизга етамиз.

Ҳурматли самарқандликлар!

Ҳамма пахта йиғим-терими учун эълон қилинган зарбдор ойликка!

Қалб амри билан билдирилаётган ушбу мурожаатимиз вилоят аҳли томонидан қўллаб-қувватланишига албатта, ишонамиз", — дейилади нашрда эълон қилинган мурожаатда.

Янгиликлар лентаси
0