ТОШКЕНТ, 1 ноя — Sputnik. "Ўзстандарт" агентлиги Тошкент ва унинг вилоятида жойлашган йирик савдо дўконларида сифатсиз маҳсулотларни аниқлади, деб хабар қилди Sputnik мухбири.
Агентлик мутахассислари томонидан 6 хилдаги маҳсулотларнинг назорат хариди амалга оширилди. Харид қилинган озиқ-овқат маҳсулотлари: сут ва колбаса маҳсулотлари, ичимлик суви, болалар озиқ-овқат маҳсулотлари, какао ва шарбатлар. Жами ҳисобда 56 хилдаги намуналар олинди.
"Ўтказилган синов натижаларига кўра 21 та маҳсулот амалдаги меъёрий ҳужжат талабларига номувофиқ деб топилди. Масалан, сут маҳсулотлари ёғ улуши органолептик нормаларига жавоб бермайди, колбаса таркибида эса крахмал миқдори кўпайиб кетган", — деб таъкидланган "Ўзстандарт " ахборотида.
Хусусан, "Гармония" қаймоғи ("Хасанмолпром" ХФ), пишлоқ ("Иззат" ХФ), "Браво" сгушенка сути ("Good Food Organic"), сметана ("Тонг сутлари"), Milky citу йогурти ("Хамидахон Баракали Тайёрлов"), Believe Milk Food йогурти, "Молочный Край" қаймоғи ва сметанаси, "Бест" қаймоғи (Angren meat-milk) ёғлилик даража талаблари ва органолептик кўрсаткичлари мос келмаслиги аниқланган.
Синов ишлари натижаларига кўра, "Тонг сутлари" корхонасининг қаймоғи, Milk сity йогурти, "Гармония" қаймоғи ҳамда Bio Natural Food йогурти бактериология талабларига мос эмаслиги аниқланди.
Бундан ташқари, "Козимжон Омад" ва "Покиза ният" корхоналари томонидан ишлаб чиқарилган колбаса маҳсулотлари консистенция, ранги, кесилгандаги кўриниши, ҳиди ва таъми кўрсатгичлари бўйича номувофиқ деб топилди. Маҳсулотларда оқсил ва крахмал моддаларнинг улуши нормаларига мос эмаслиги маълум бўлди.
Агентлик маълумотларига кўра, Республика синов ва сертификация маркази лабораторияси томонидан 9 ой давомида ўтказилган физик-кимёвий ва органолептик синовлар натижасида 232 ҳолат озиқ-овқат маҳсулотлари яроқсиз деб топилди.
