ТОШКЕНТ, 18 янв — Sputnik. Терроризмда айбланаётган Сайфулло Соиповнинг адвокатлари одил судловга битимни таклиф қилишмоқда, унга кўра судланувчи ўлим жазосидан халос этилиши мумкин, дейилган суд ҳужжатларида.
Айбловчи томон ўлим жазосини сўраш борасида аниқ бир фикрга келгани йўқ, бу борада Бош прокурор Жефф Сешнснинг қарори кутилмоқда, деб хабар қилади РИА Новости.
Эслатиб ўтамиз, 31 октябрь куни Манхеттенда юк машинасида бир неча кишининг ҳаётига зомин бўлган Сайфулло Соиповга терроризм ва қотиллик бўйича айблов эълон қилинди.
Соиповга умумий ҳисобда 8 та қотиллик (ҳужум қурбонлари сони бўйича), 12 та қотиллик содир этишга уриниш (жабрланганлар сони бўйича), ИД террорчилик гуруҳига кўмак бериш ва кўмак беришга уриниш, зўравонлик ва транспорт воситасига зарар етказиш бандлари бўйича айблов қўйилган эди.
Адлия вазирлиги хабарида қайд этилишича, Соипов юк машинасида ҳужум қилишга уни телефон орқали кўрган ИД видеоси илҳом берганини тан олган. У жиноятни содир этишни бир йил аввал ўйлаб қўйган, ҳужумдан икки ой аввал эса "кўпроқ бегуноҳ одамлар жабрланиши" учун уни юк машинаси ёрдамида амалга оширишга қарор қилган. У терактдан бир ҳафтача олдин юк машинасини ижарага олиб, уни бошқаришни машқ қила бошлаган.
Соипов юк машинасида Манхэттеннинг жануби-ғарбида жойлашган велосипедчилар йўлагида учраган велосипедчиларни босиб, бир неча кўча юриб ўтган, сўнгра мактаб автобусига урилиб тўхтаган.
Ҳужум оқибатида 8 киши ҳалок бўлган, 12 киши жароҳат олган.
