ТОШКЕНТ, 14 фев – Sputnik. Ўзбекистон фуқароси Н.Қирғизов қаҳрамонона ҳаракати ва Россия фуқаросини ёнғиндан қутқаргани учун медалга тавсия этилди. Бу ҳақда Ўзбекистон ТИВ матбуот хизмати хабар бермоқда.
Аввалроқ Москва вилояти Софрино қишлоғида меҳнат фаолияти билан шуғулланадиган самарқандлик Нуриддин Қирғизов олов ичида қолган уйни кўриб Россия фуқароси бўлган кекса аёлга ёрдам бергани ва жароҳатлангани ҳақида хабар берилганди.
Ўзбекистоннинг Москва шаҳридаги элчихонаси маълумотига кўра, ҳозирги вақтда Н.Қирғизовга Москва вилояти Пушкино шаҳрида жойлашган профессор В.Н.Розанов номидаги туман шифохонасида тиббий ёрдам кўрсатилмоқда.
У реанимация бўлимидан травматология бўлимига ўтказилган бўлиб, шифохонада элчихонанинг консуллик бошқармаси ходими у билан учрашди.
Пушкино шаҳри маъмурияти хабарига кўра, Н.Қирғизов қаҳрамонона ҳаракати ва Россия фуқаросини ёнғиндан қутқаргани учун медалга тавсия этилди.
