ТОШКЕНТ, 1 мар — Sputnik. “Ялла” ансамбли раҳбари Фаррух Зокировга Қирғизистон президенти номидан “Дўстлик” ордени топширилди.
Мукофотни Қирғизистон президенти номидан республиканинг Ўзбекистондаги Фавқулодда ва мухтор элчиси Данияр Сыдыков топширди. Мукофот топшириш маросими Ўзбекистон ва Қирғизистон орасида дипломатик муносабатлар ўрнатилганининг25 йиллиги арафасида амалга оширилди.
Новости Узбекистана хабарига кўра, ушбу мукофот ҳақидаги фармон 2017 йилнинг ноябрь ойида, Қирғизистон собиқ президенти Алмазбек Атамбаев томонидан имзоланган.
Фармонда айтилишига кўра, ушбу мукофот Фаррух Зокировга Ўзбекистон ва Қирғизистон халқлари орасидаги дўстликни мустаҳкамлашга қўшган ҳиссаси ҳамда кўп йиллик унумли ижодий меҳнати учун берилган.
Фаррух Зокиров 1976 йилдан буён “Ялла” ансамблига раҳбарлик қилиб келмоқда. Ансамблнинг Ўзбекистон, МДҲ мамлакатлари, АҚШ, Исроил ва дунёнинг бошқа мамлакатларида ҳам мухлислари жуда кўп.
