ТОШКЕНТ, 21 май — Sputnik. Ўзбекистон президенти Шавкат Мирзиёевнинг Андижонга икки кунлик сафари якунланди. Ўзбекистон раҳбари 20 май куни Тошкентга қайтди, деб хабар қилди президент матбуот-хизмати.
Мирзиёев Андижонга сафари давомида нималарга эътибор қаратди?
Махсус жамғарма
"Ўрмон хўжалиги ерларида фойдаланилмаётган имконият кўп. Масалан, писта, ёнғоқ, нўхот, ловия каби харидоргир маҳсулотлар, заъфарон, наъматак ва бошқа доривор ўсимликлардан қанча даромад олса бўлади! Асал етиштириш ҳам мумкин. Фақат илм, изланиш, ҳаракат керак. Вақти келиб, ўрмон хўжалиги алоҳида йирик соҳага айланиши зарур", — деди Мирзиёев.
Шунингдек, вилоятда балиқчиликни ривожлантириш масаласига ҳам эътибор қаратилди. Жорий йилда 11 туманда янги ҳовузлар барпо этиш, аҳоли томорқалари ҳамда шоли майдонида Хитой ва Вьетнам технологияси асосида балиқ етиштириш режалаштирилган.
50та кўп қаватли уй
Шавкат Мирзиёевнинг ўтган йилги ташрифи чоғида Султонжўра маҳаласида бешта, Мустақиллик маҳалласида иккита 7 қаватли уй қурилиб, фойдаланишга топширилган эди.
Жорий йилда 14 та шундай турар жой барпо этилмоқда. Мирзиёев Андижонда бу масала долзарб эканини инобатга олиб, шу йилнинг ўзида қўшимча яна бешта 7 қаватли уй қуриш бўйича топшириқ берди.
Режага кўра, бу йил Андижон шаҳрида 19 та, яқин йилларда жами 50 та кўп қаватли уй бунёд этилиши белгиланган.
Минглаб иш ўринлари
Мирзиёев Андижон вилояти Улуғнор туманида бўлиб ўтган йиғилишда жорий йилда вилоятда яратилиши режалаштирилаётган 25 мингта иш ўрни Ҳукуматни мутлақо қониқтирмаслигини айтди.
"Вилоятда жорий йилда 25 мингта иш ўрни яратиш назарда тутилгани бизни мутлақо қониқтирмайди. Чунки ишсизлар сони бундан юқори.
Ҳокимлар, секторлар раҳбарлари инвестиция ва технология олиб келиб, саноат ва хизмат кўрсатиш корхоналарини ташкил этишга, шу орқали одамларни иш билан таъминлашга кўмак бериши керак", — деди Ўзбекистон раҳбари.
Мирзиёев ташрифи арафасида махсус Ишчи гуруҳ томонидан мавжуд имкониятларни кенг сафарбар қилиш ҳисобига 51 мингдан зиёд иш ўрни яратиш бўйича режа ишлаб чиқилганини таъкидлаган.
Ҳар бир оила тадбиркор
Ўзбекистон раҳбари, шунингдек, Андижонга сафари давомида "Ҳар бир оила тадбиркор" дастури концепцияси билан танишди.
Ушбу концепция меҳнат билан банд бўлмаган аҳолини тадбиркорлик, ҳунармандлик, фермерлик, касаначиликка ўргатиш орқали уларга даромад манбаи яратиб беришга қаратилган.
Президент тадбиркор ва ҳунармандлар етказиб берадиган маҳсулотлар сиғимини аниқлаш, одамлар сотиб оладиган товарлар ишлаб чиқариш, хусусан, паррандачилик ва балиқчиликни ривожлантириш бўйича мутасаддиларга топшириқлар берган.
